ဘရာဇီးလ်ကလပ် ဂရီမီယိုအသင်းတွင် ကစားနေသည့် ဥရုဂွေးဝါရင့်တိုက်စစ်မှူး ဆွာရက်ဇ်က မက်ဆီနှင့်ပြန်လည်တွဲကစားရန်အတွက် အင်တာမိုင်ယာမီအသင်းသို့ ပြောင်းရွှေ့မည်ဆိုခြင်းမှာ မဟုတ်မှန်ကြောင်း ငြင်းဆန်ပယ်ချလိုက်သည်။
မက်ဆီသည် အမေရိကန် မေဂျာလိဂ်ကလပ် အင်တာမိုင် ယာမီအသင်းသို့ ပြောင်းရွှေ့မည်ဟု အတည်ပြုပြီးနောက် ဆွာရက်ဇ်အနေဖြင့် ဘာစီလိုနာအသင်းဖော်ဟောင်း မက်ဆီနှင့် တွဲဖက်ကစားရန် အင်တာမိုင်ယာမီသို့ ပြောင်းရွှေ့ ဖွယ်ရှိနေသည်ဟု သတင်းများထွက်ပေါ်လာခြင်းဖြစ်သည်။
သို့သော် ဆွာရက်ဇ်က ယင်းသတင်းများကို ငြင်းဆန်ခဲ့ပြီး မိမိအနေဖြင့် ဂရီမီယိုအသင်းတွင် ပျော်ရွှင်နေကြောင်း ပြောကြားခဲ့ခြင်းဖြစ်သည်။
“အင်တာမိုင်ယာမီအသင်းကို ပြောင်းမယ်ဆိုတဲ့သတင်းတွေက အမှန်မဟုတ်ပါဘူး။ သတင်းမှားတွေ ဖြစ်ပါတယ်။ အင်တာမိုင်ယာမီကို ပြောင်းရွှေ့ဖို့လည်း မဖြစ်နိုင်ပါဘူး။ ဂရီမီယိုမှာ ကျွန်တော် ပျော်နေပြီး စာချုပ်ကလည်း ၂၀၂၄ ခုနှစ်အထိ ရှိနေတာပါ”ဟု ဆွာရက်ဇ်က ပြောကြားခဲ့သည်။
