ရီးယဲလ်မက်ဒရစ်အသင်းသည် ပြီးခဲ့သည့် ရက်ပိုင်းအတွင်းက အသင်း၏တိုက်စစ်ကစားသမားများဖြစ်သည့် ဘန်ဇီမာ၊ ဟာဇက်၊ အဆန်စီယို၊ မာရီယာနိုဒီယက်ဇ်တို့နှင့် ယခုနွေရာသီတွင် လမ်းခွဲမည်ဖြစ်ကြောင်း အတည်ပြုကြေညာခဲ့ပြီးနောက် အသုံးစရိတ် ယူရို (၇၅)သန်းနီးပါးကို လျှော့ချနိုင်ခဲ့ကြောင်း စပိန်အားကစားသတင်းစာ Football Espana က ဖော်ပြခဲ့သည်။
၂၀၂၃ နွေရာသီအပြောင်းအရွှေ့ဈေးကွက်အတွင်း ပြင်ဆင်အားဖြည့်မှုများစွာပြုလုပ်သွားမည့် ရီးယဲလ်မက်ဒရစ်အသင်းသည် အသင်း၏ အဓိကဝါရင့်တိုက်စစ်မှူး ဘန်ဇီမာအပါအဝင်၊ အသင်းတွင်ပုံမှန်ပွဲထွက်ခွင့်ရရန် ရုန်းကန်နေရပြီး ခြေစွမ်းမပြနိုင်သည့် ဟာဇက်၊ အဆန်စီယိုနှင့် မာရီယာနိုတို့အား (၂)ရက်အတွင်း လမ်းခွဲကြောင်း ကြေညာခဲ့ခြင်းဖြစ်ပြီး ကစားသမား (၄)ဦး၏ တစ်နှစ် လစာငွေများကို စုပေါင်းတွက်ချက်ပါက ယူရို (၇၅)သန်း နီးပါးအထိတန်ကြေးရှိနေခြင်းဖြစ်သည်။
ယခုရာသီ ရီးယဲလ်မက်ဒရစ်အသင်း၏ ကစားသမားလစာငွေပေးချေမှုအရ ဘယ်လ်ဂျီယံတောင်ပံကစားသမား အီဒင်ဟာဇက်မှာ တစ်နှစ်လစာငွေ ယူရိုသန်း (၃၀)ဖြင့် အသင်း၏လစာငွေ အများဆုံးကစားသမားအဖြစ်ရပ်တည်နေပြီး၊ ပြင်သစ်ဝါရင့်တိုက်စစ်မှူး ဘန်ဇီမာက ယူရို (၂၈)သန်း၊ စပိန်တောင်ပံကစားသမား အဆန်စီယိုနှင့် ဒိုမီနီကန်တိုက်စစ်မှူး မာရီယာနိုဒီယက်ဇ်တို့က ယူရို (၉)သန်းစီအသီးသီးရရှိနေပြီး ယခုကဲ့သို့ လစာငွေမြင့်မားသည့်ကစားသမားများ အသင်းမှထွက်ခွာသွားခြင်းကြောင့် လစာငွေအသုံးစရိတ်များသိသာစွာလျော့ကျသွားခဲ့ခြင်းဖြစ်သည်။
ထို့ပြင် ရီးယဲလ်အသင်းမှထွက်ခွာမည့် အဆိုပါတိုက်စစ်ကစားသမား (၄)ဦးထဲ၌ ဘန်ဇီမာ၊ အဆန်စီယိုနှင့် မာရီယာနိုဒီယက်ဇ်တို့မှာ ယခုနွေရာသီတွင် စာချုပ်သက်တမ်းကုန်ဆုံးပြီး စာချုပ်သစ်မချုပ်ဆိုခဲ့ခြင်းကြောင့် အသင်းနှင့် လမ်းခွဲခဲ့ခြင်းဖြစ်သော်လည်း ဟာဇက်မှာမူ ၂၀၂၄ နွေရာသီအထိ စာချုပ်တစ်နှစ်ကျန်ရှိနေပြီးမှ နှစ်ဦးသဘောတူစာချုပ်ဖျက်သိမ်းခဲ့ခြင်းဖြစ်ကြောင်းသိရသည်။
ရီးယဲလ်အသင်းအနေဖြင့် ဟာဇက်အား စာချုပ်ဖျက်သိမ်းမှုအတွက် လျော်ကြေး ယူရို (၇)သန်းပေးချေခဲ့ရပြီး ဟာဇက်အနေဖြင့် ကစားသမားဘဝမှအနားယူသွားရန် စီစဉ်နေကြောင်းလည်း စပိန်အားကစားသတင်းစာ AS ကဖော်ပြခဲ့သည်။
ယခုကဲ့သို့ လစာငွေအသုံးစရိတ်များလျော့ကျသွားခြင်းကြောင့် ရီးယဲလ်အသင်းအနေအဖြင့် လာမည့် နွေရာသီအပြောင်းအရွှေ့တွင် ကစားသမားသစ်ခေါ်ယူမှုများကို ပိုမိုပြုလုပ်နိုင်မည်ဖြစ်ပြီး၊ အသင်း၏လစာငွေကန့်သတ်ချက်အပေါ်တွင်လည်း ကောင်းမွန်သော အကျိုးသက်ရောက်မှုများရှိခဲ့ကြောင်း စပိန်မီဒီယာများက ဖော်ပြခဲ့ကြသည်။
လက်ရှိတွင် ရီးယဲလ်အသင်း၌ တိုက်စစ်ကစားသမားများအဖြစ် ဘရာဇီးလ်တောင်ပံကစားသမားများဖြစ်သည့် ဗင်နီစီယပ်စ်နှင့် ရိုဒရီဂိုတို့နှစ်ဦးသာ ကျန်ရှိတော့ပြီး နွေရာသီ၌ အနည်းဆုံးထိပ်တန်းတိုက်စစ်မှူးနှစ်ဦးကို ခေါ်ယူသွားမည်ဖြစ်ကာ ယူရိုသန်း (၁၅၀)အထိအသုံးပြုသွားဖွယ်ရှိနေကြောင်း စပိန်အားကစားသတင်းစာ AS ကဖော်ပြခဲ့သည်။
