ယခုရာသီကုန်တွင် လီဗာပူးလ်အသင်းနှင့် လမ်းခွဲမည့် အင်္ဂလန်ဝါရင့်ကွင်းလယ်ကစားသမား ဂျိမ်းစ်မီလ်နာက အသင်းနည်းပြ ကလော့ပ်အနေဖြင့် မိမိအား အသင်းတွင် နောက်ထပ်တစ်ရာသီ ဆက်ရှိနေရန်အလိုရှိခဲ့ကြောင်း ဖွင့်ဟပြောကြားခဲ့သည်။
မီလ်နာ (၃၇ နှစ်)သည် ယခုရာသီကုန်တွင် စာချုပ်သက်တမ်းကုန်ဆုံးပြီးနောက် လီဗာပူးလ်အသင်းနှင့်လမ်းခွဲမည့် ကစားသမား (၄) ဦးထဲတွင် တစ်ဦးအပါအဝင်ဖြစ်သည်။
မီလ်နာသည် ၂၀၁၅ ခုနှစ်တွင် မန်စီးတီးမှ လီဗာပူးလ်အသင်းထံ ပြောင်းရွှေ့ကြေးအလွတ်ဖြင့် ရောက်ရှိလာပြီး ပြိုင်ပွဲစုံ (၃၃၁)ပွဲတွင် (၂၆) ဂိုးသွင်းယူခဲ့ကာ ပရီးမီးယားလိဂ်နှင့် ချန်ပီယံလိဂ်ဖလားအပါအဝင် ဆုဖလား (၇)လုံး ရယူနိုင်ခဲ့သည်။
မီလ်နာက “ယာဂန်ကလော့ပ်က အရမ်းတော်တဲ့နည်းပြဖြစ်ပြီး ကျွန်တော့်ကို အသင်းမှာ တစ်ရာသီဆက်ကစားဖို့ အလိုရှိခဲ့တာပါ။ ကျွန်တော့်အနေနဲ့ ဒီရာသီမှာ ပွဲတွေအများကြီး မကစားခဲ့ရပေမဲ့ အသင်းအတွက် နည်းပြတောင်းဆိုသလို ကစားနိုင်တုန်းပဲလို့ ခံစားရပါတယ်။ အခုဆုံးဖြတ်ချက်ကို ကလပ်အသင်းတာဝန်ရှိသူတွေက ချမှတ်ခဲ့တာပါ။ နည်းပြက ကျွန်တော့်ကို နောက်ဆုံးအချိန်ထိ အလိုရှိခဲ့တယ် ဆိုတဲ့အချက်က ကျွန်တော့်အတွက် အရမ်းကောင်းပါတယ်” ဟု ပြောကြားခဲ့သည်။
မီလ်နာသည် လာမည့်နွေတွင် ဘရိုက်တန်အသင်းသို့ ပြောင်းရွှေ့ကြေးအလွတ်ဖြင့် ရောက်ရှိရန် အလွန်နီးစပ်နေကြောင်း ဗြိတိန်မီဒီယာများက ဖော်ပြနေကြသည်။
