ဘာစီလိုနာအသင်းသည် ဧပြီ (၂)ရက်နေ့က ယှဉ်ပြိုင်ကစားခဲ့သော စပိန်လာလီဂါပွဲစဉ် (၂၇)တွင် အယ်လ်ချီအသင်းအား အဝေးကွင်း၌ (၄-၀)ဂိုးဖြင့်အနိုင်ရခဲ့ပြီးနောက် လာလီဂါပြိုင်ပွဲသမိုင်း၏ ပေးဂိုးမရှိပွဲ (Clean Sheet) စံချိန် မှတ်တမ်းကောင်းတစ်ခုကို ပိုင်ဆိုင်ခဲ့ကြောင်း သိရသည်။
ဘာစီလိုနာအသင်းသည် ယခုရာသီ လာလီဂါပွဲစဉ် (၂၇)ပွဲကစားပြီးချိန်တွင် Clean Sheet ပွဲ (၂၀)အထိ ရရှိခဲ့ပြီး လာလီဂါပြိုင်ပွဲသမိုင်းတစ်လျှောက် တစ်ရာသီအတွင်း Clean Sheet ပွဲ (၂၀)အမြန်ဆုံးပြည့်သည့်စံချိန်သစ် တင်ရှိနိုင်ခဲ့ခြင်းဖြစ်သည်။
လာလီဂါပြိုင်ပွဲသမိုင်းတစ်လျှောက် ယခင်တစ်ရာသီအတွင်း Clean Sheet ပွဲ (၂၀)အမြန်ဆုံးပြည့်သည့် အသင်းအဖြစ် စံချိန်တင်ထားသည်မှာ လက်ရှိလာလီဂါတတိယတန်း (Primera Division RFEF) တွင်ကစားနေသည့် ဒီပို့တီဗိုအသင်းဖြစ်ပြီး ၁၉၉၃-၉၄ ရာသီက လာလီဂါ ပွဲစဉ်(၂၉)ပွဲကစားပြီးချိန်တွင် Clean Sheet ပွဲ(၂၀) ပြည့်မြောက်ပြီး စံချိန်တင်ထားခြင်းဖြစ်သည်။
ယခုအခါ ဘာစီလိုနာအသင်းက ဒီပို့တီဗိုအသင်းထက် (၂)ပွဲလျော့နည်းကာ Clean Sheet ပွဲ (၂၀)အမြန်ဆုံးပြည့်ခဲ့ခြင်းဖြစ်ပြီး အသင်းသမိုင်း၏ အကောင်းဆုံးသော ခံစစ်စံချိန်မှတ်တမ်းတစ်ခုလည်းဖြစ်ခဲ့သည်။ ထို့ပြင် ဘာစီလိုနာအသင်းသည် ယခုရာသီလာလီီဂါပြိုင်ပွဲတွင် ပေးဂိုး(၉)ဂိုးသာခွင့် ပြုထားရပြီး ဥရောပထိပ်တန်းလိဂ် (၅)ခုတွင် အခြားမည်သည့်အသင်းထက်မဆို အနည်းဆုံး (၇)ဂိုးလျော့နည်းကာ ပေးဂိုးအနည်းဆုံးအသင်းအဖြစ်လည်း စံချိန်တင်ထားနိုင်ခဲ့သည်။
ဘာစီလိုနာအသင်းအနေဖြင့် ယခုစံချိန်မှတ်တမ်းအပြင် ရာသီကုန်၌ အခြားခံစစ်စံချိန်မှတ်တမ်းများစွာကိုလည်း ထပ်မံချိုးဖျက်ဖွယ်ရှိနေပြီး ၁၉၉၃-၉၄ ရာသီက ဒီပို့တီဗိုအသင်း၏ တစ်ရာသီအတွင်း Clean Sheet ပွဲအများဆုံးစံချိန် (၂၆ ပွဲ) နှင့် လာလီဂါပြိုင်ပွဲသမိုင်းတစ်လျှောက် တစ်ရာသီအတွင်းပေးဂိုးအနည်းဆုံးစံချိန်တင်ရှိထားသည့် ဒီပို့တီဗို (၁၉၉၃-၉၄)၊ အက်သလက်တီကို (၂၀၁၅-၁၆) (၁၈ ဂိုး) တို့၏ စံချိန်မှတ်တမ်းများကို ကျော်ဖြတ်နိုင်ရန် နီးစပ်နေခြင်းဖြစ်သည်။
