အီတလီလူမျိုးမန်နေဂျာကွန်တီသည် စပါးအသင်းနှင့် လမ်းခွဲရန် နှစ်ဘက်သဘောတူညီမှု ရရှိသွားပြီဖြစ်သည်။ ကွန်တီသည် စပါးအသင်းအတွက် ဆုဖလားဆွတ်ခူးပေးနိုင်ခြင်းမရှိဘဲ စပါး၏ ၁၅ နှစ်ကြာ ဆုဖလားခန်းခြောက်နေခြင်းမှာ ဆက်လက်တည်ရှိနေသည်။
စပါးအသင်းကို ရာသီကုန်အထိ စတယ်လီနီက မန်နေဂျာအဖြစ်လည်းကောင်း ရိုင်ယန်မေဆင်က နည်းပြချုပ်အဖြစ်လည်းကောင်း ဆက်လက်ကိုင်တွယ်သွားမည်ဖြစ်ကြောင်း အသင်းက တရားဝင်သတင်းထုတ်ပြန်သည်။
အသင်း၏အကြီးအကဲလက်ဗီက “ကျွန်တော်တို့ ပရီးမီးယားလိဂ် ၁၀ ပွဲကစားဖို့ ကျန်နေပါသေးတယ်။ လာမယ့်နှစ် ချန်ပီယံလိဂ်ဝင်ခွင့်ရဖို့ကိုလည်း တိုက်ခိုက်ကြိုးစားရဦးမယ်။ အသင်းသားတွေအားလုံး စည်းလုံးညီညွတ်ဖို့လိုအပ်ပါတယ်။ အသင်းနဲ့ ပရိသတ်တွေအတွက် ရာသီအကုန်မှာ အမြင့်ဆုံး အဆင့်တစ်ခုကိုရောက်ရှိဖို့ အတတ်နိုင်ဆုံး ကြိုးစားသွားရမှာပါ”ဟု ပြောဆိုလိုက်သည်။
စပါးသည် ချန်ပီယံလိဂ်နှင့် အက်ဖ်အေဖလားမှ ထွက်ခဲ့ရပြီဖြစ်သလို ပြီးခဲ့သည့်စနေနေ့က ကစားသည့် ဆောက်သမ်တန်နှင့် ပရီးမီးယားလိဂ်ပွဲစဉ်တွင်လည်း အမှတ်လျော့ခဲ့သဖြင့် အဆင့် ၄ အတွင်းဝင်ရေး ရည်မှန်းချက်ထိခိုက်ခဲ့ရသည်။ ကွန်တီက အသင်းပိုင်ရှင်နှင့် အသင်းသားများကို ပြင်းထန်စွာဝေဖန်ခဲ့ပြီး ၎င်းကို အလုပ်ထုတ်လျှင်လည်း စပါးအသင်း၏ အခြေအနေမှာ မည်သို့မျှ ပြောင်းလဲလာမည်မဟုတ်ကြောင်း ပြောဆိုခဲ့သည်။
စပါးသည် တနင်္ဂနွေနေ့ညက ကွန်တီကို အလုပ်ထုတ်ခဲ့ပြီးနောက် မန်နေဂျာသစ်တစ်ဦးကို ရှာဖွေနေသည်။ ဘိုင်ယန်မြူးနစ်မှ ပြီးခဲ့သည့်ရက်ပိုင်းတွင် အလုပ်ထုတ်ခံခဲ့ရသော ဂျာမန်လူမျိုး နည်းပြချုပ် နာဂယ်စ်မန်းသည် စပါးအသင်းမန်နေဂျာ ဖြစ်လာနိုင်သည်ဟုလည်း မီဒီယာများက ခန့်မှန်းရေးသားကြသည်။ ထို့ပြင် စပါးအသင်းမန်နေဂျာဟောင်း ပိုချက်တီနိုသည်လည်း အသင်းသို့ ပြန်ရောက်လာနိုင်သည်ဟု အချို့မီဒီယာများက ခန့်မှန်းရေးသားနေသည်။
