ယူရိုပါလိဂ်ပြိုင်ပွဲမှ ထွက်ခဲ့ရပြီးနောက် ပရီးမီးယားလိဂ်လက်ကျန် ၁၁ ပွဲကို ဗိုလ်လုပွဲကဲ့သို့ ယှဉ်ပြိုင်သွားမည်ဖြစ်ကြောင်း အာဆင်နယ်အသင်းနည်းပြ အာတီတာက ပြောကြားခဲ့သည်။
အာဆင်နယ်အသင်းသည် ကြာသပတေးနေ့က ယှဉ်ပြိုင်ကစားသည့် ယူရိုပါလိဂ် ၁၆ သင်းအဆင့်ပွဲစဉ်တွင် စပို့တင်းလစ္စဘွန်း အသင်းအား ပယ်နယ်တီအဆုံးအဖြတ်ဖြင့် ရှုံးနိမ့်ပြီးနောက် ပြိုင်ပွဲမှထွက်ခဲ့ရပြီဖြစ်သည်။ အာဆင်နယ်အသင်းအနေဖြင့် ပထမအကျော့ အဝေးကွင်းပွဲ၌ နှစ်ဂိုးစီသရေကျထားပြီး အိမ် ကွင်းပွဲတွင်လည်း ချာကာ(၁၉ မိနစ်)၏ သွင်းဂိုးဖြင့် ဦးဆောင်ကစားနိုင်ခဲ့သည်။
သို့သော် ၆၂ မိနစ်တွင် ပတ်ဒရိုဂွန်ကာလ်ဗက်စ်၏ အဝေးကန်ချက်ဖြင့် သွင်းယူသည့်ချေပဂိုး ခွင့်ပြုခဲ့ရပြီး နှစ်ကျော့ပေါင်းရလဒ် (၃-၃) ဂိုးစီဖြစ်နေသောကြောင့် အချိန်ပို၊ ပယ်နယ်တီအထိ ဆက်လက်ယှဉ်ပြိုင်ခဲ့ရသည်။ ပယ်နယ်တီကန်ရာတွင် အာဆင်နယ်အတွက် စတုတ္ထမြောက်ကန်သွင်းသူ မာတင်နယ်လီ လွဲချော်ခဲ့သောကြောင့် (၃-၅) ဂိုးဖြင့် ရှုံးနိမ့်ခဲ့ခြင်းဖြစ်သည်။ သို့ဖြစ်ရာ အာဆင်နယ်အသင်းအနေဖြင့် ပရီးမီးယားလိဂ်ပြိုင်ပွဲသာ ဆက်လက်ယှဉ်ပြိုင်ရန် ကျန်ရှိတော့သည်။
ယင်းပွဲအပြီးတွင် အာတီတာက “ဒါက ဆိုးရွားတဲ့ရလဒ်ပါ။ ကျွန်တော်တို့အနေနဲ့ တကယ်ကို နောက်တစ်ဆင့်တက်ချင်ပြီး ဒီပြိုင်ပွဲမှာ ဆက်ပြီးတိုက်ပွဲဝင်ချင်တာပါ။ ဒီနေ့ပွဲမှာ ကျွန်တော်တို့ မိနစ် ၁၂၀ နဲ့ ပယ်နယ်တီအထိ ကြိုးစားခဲ့ပါတယ်။ ဒါပေမဲ့ လုံလောက်မှု မရှိခဲ့ပါဘူး။ ကိုယ့်ကိုယ်ကိုသုံးသပ်ရရင် ပွဲအစကတည်းက အခက်အခဲတွေရှိခဲ့တာပါ။ ပွဲအစမှာပဲ တိုမီ (တိုမီယာဆု) ကို ဆုံးရှုံးခဲ့ရပြီး ဆာလီဘာကို ထပ်ပြီးဆုံးရှုံးလိုက်ရချိန်မှာတော့ ပွဲကိုစီမံခန့်ခွဲရတာ တကယ်ခက်ခဲသွားပါတယ်။ ပရီးမီးယားလိဂ်ပွဲစဉ် ၁၁ ပွဲကစားဖို့ ကျန်ပါသေးတယ်။ နောက်ထပ်ကစားရမယ့် ဗိုလ်လုပွဲက ခရစ္စတယ်ပဲလေ့စ်နဲ့ ပွဲပါ” ဟု ပြောကြားခဲ့သည်။