မန်ယူအသင်းကွင်းလယ်ကစားသမား အဲရစ်ဆင်သည် လက်ရှိဘောလုံးရာသီတွင် အသင်းအတွက် ပြန်လည်ကစားပေးနိုင်မည်မှာသေချာကြောင်း တန်းဟက်က အတည်ပြုပြောဆိုလိုက်သည်။
ပြီးခဲ့သည့်ဇန်နဝါရီလအတွင်း ရက်ဒင်းအသင်းနှင့်ကစားစဉ် တိုက်စစ်မှူး အန်ဒီကာရိုးလ်နှင့် ထိမိခြင်းကြောင့် အဲရစ်ဆင်သည် ဒူးအရွတ်ဒဏ်ရာရရှိသွားခြင်းဖြစ်သည်။ အဆိုပါဒဏ်ရာကို ခွဲစိတ်ကုသမှုခံယူခဲ့ရပြီး ဒိန်းမတ်လက်ရွေးစင်သည် ကာလရှည်နားနေခဲ့ရသည်။
မူလက ဧပြီ သို့မဟုတ် မေလအထိ အဲရစ်ဆင်အနေဖြင့် အနားယူရမည်ဖြစ်ကြောင်း သတင်းများ ထွက်ပေါ်ခဲ့သည်။ တန်းဟက်က အဲရစ်ဆင်၏ဒဏ်ရာ အခြေအနေသည် ပုံမှန်အတိုင်းတိုးတက်မှု ရှိနေကြောင်း မတ်လကုန်တွင် ကစားရန်ရှိသော နိုင်ငံတကာပွဲများ ကစားသည့် အချိန်မတိုင်မီတော့ အဲရစ်ဆင်ပြန်ကစားနိုင်ရန် မရှိကြောင်း တန်းဟက်က ပြောဆိုလိုက်သည်။
“ဒီနှစ်ဘောလုံးရာသီမှာအဲရစ်ဆင် ပြန်ကစားနိုင်မှာပါ။ ကျိန်းသေပါတယ်။ အခုအချိန်မှာတေ့ာ ဘယ်တော့ပြန်ကစားနိုင်မယ်ဆိုတာကို အတိအကျပြောလို့မရပါဘူး။ သူ့ရဲ့ဒဏ်ရာက ပြန်လည် တိုးတက်မှုက သတ်မှတ်ထားတဲ့ အချိန်ဇယားအတိုင်းတိုးတက်နေပါတယ်။ သူပြန်ကစားနိုင်မှာ သေချာပါတယ်။ နိုင်ငံတကာပွဲတွေ မတိုင်ခင်ပြန်ကစားနိုင်ဖို့ကတော့ မဖြစ်နိုင်ဘူး”ဟု တန်းဟက်က ပြောဆိုလိုက်သည်။ အဲရစ်ဆင်သည် မန်ယူအသင်းကစားသမား အစည်းအဝေးများတွင်လည်း ပါဝင်ကြောင်း တန်းဟက်က ပြောဆိုသည်။ မန်ယူသည် လာမည့်တနင်္ဂနွေနေ့တွင် ပရီးမီးယားလိဂ်ပွဲစဉ်အဖြစ် အိုးထရက်ဖို့တွင် ဆောက်သမ်တန်နှင့် ကစားရန်ရှိနေသည်။
