ဘရာဇီးလ်ကလပ် ဖလာမင်ဂိုအသင်းသည် အသင်းကစားသမားဟောင်းဖြစ်သူ ဝုလ်ဗ်ကွင်းလယ်လူဂျော်အိုဂိုးမက်စ်ထံ ပေးရန်ရှိသည့်ငွေကြေးပေးပို့ရာတွင် ဖလာမင်ဂို ဘက်စကတ်ဘောအသင်း၌ ကစားခဲ့ဖူးသည့် အမည်တူသူထံ မှားယွင်းရောက်ရှိသွားခဲ့ကြောင်း သိရသည်။
ဂျော်အိုဂိုးမက်စ်သည် ပြီးခဲ့သည့်ဇန်နဝါရီအပြောင်းအရွှေ့ကာလက ဝုလ်ဗ်အသင်းထံ ပေါင် ၁၅ သန်းဖြင့် ပြောင်းရွှေ့ခဲ့ပြီး ငါးနှစ်ခွဲသက်တမ်းရှိ စာချုပ်တစ်ရပ် ချုပ်ဆိုခဲ့သည်။ ထို့ကြောင့် ဖလာမင်ဂိုအသင်းသည် ဂျော်အိုဂိုးမက်စ် အသင်းတွင်ကစားခဲ့စဉ် ပေးချေရမည့် မူပိုင်ခွင့်ငွေ ပေါင် ၃၀၆၀၀၀ ကို ပေးပို့ရာတွင် မှားယွင်းခဲ့ခြင်းဖြစ်သည်။
ဘရာဇီးလ် သတင်းစာ Globo က ရေးသားသည့်သတင်းတွင် ဘက်စကတ်ဘောသမား ဂျော်အိုဂိုး မက်စ်သည် ၂၀၂၀ ခုနှစ်တွင် ဖလာမင်ဂိုအသင်းမှ ထွက်ခွာခဲ့ကာ လက်ရှိတွင် အပျော်တမ်းလိဂ်၌ ကစားနေသူဖြစ်သည်ဟု ဖော်ပြထားသည်။
အဆိုပါဘက်စကတ်ဘောသမားက “ဒီငွေလွှဲဝင်လာချိန်မှာ ကျွန်တော်က ခရီးသွားနေခဲ့တာပါ။ ဒီငွေကြေး ဘယ်ကလာသလဲဆိုတာ မသိချိန်မှာတော့ ကျွန်တော် ထိတ်လန့်နေမိခဲ့တယ်။ တစ်စုံတစ်ယောက်က မှားယွင်းလွဲတာမျိုးဖြစ်နိုင်သလို၊ တခြားကြောင့်လည်း ဖြစ်နိုင်တယ်လို့ တွေးမိခဲ့တယ်”ဟု ပြောကြားခဲ့သည်။
