၂၀၁၉-၂၀ ရာသီ ချန်ပီယံလိဂ်ပြိုင်ပွဲတွင် PSG အသင်းကိုအနိုင်ရပြီး ဗိုလ်စွဲသွားခဲ့သည့် ဘိုင်ယန်မြူးနစ်အသင်းအား ဥရောပမီဒီယာအသီးသီးက ချီးကျူးခဲ့ကြပြီး ယနေ့ခေတ်ဘောလုံးလောက၏ အကောင်းဆုံးအသင်း တစ်သင်းဖြစ်သည်ဟု သုံးသပ်မှုများရှိခဲ့သည်။
ဘိုင်ယန်မြူးနစ်အသင်း၏ ချန်ပီယံလိဂ်အောင်မြင်မှုတွင် ထူးခြားခဲ့သည့်အချက်မှာ ပြိုင်ပွဲအစမှအဆုံးအထိ (၁၁)ပွဲစလုံးကို အနိုင်ရရှိအောင် ကစားနိုင်ခဲ့ခြင်းဖြစ်ပြီး ယင်းကဲ့သို့ စွမ်းဆောင်နိုင်ခဲ့သည့်အသင်း တစ်သင်းမျှမရှိခဲ့ချေ။
ထို့အတူ အသင်း၏ပိုလန်လက်ရွေးစင်တိုက်စစ်မှူး လီဝန်ဒေါစကီးမှာလည်း ဗိုလ်လုပွဲတွင် ဂိုးမသွင်းနိုင်ခဲ့သော်လည်း ယခုရာသီ ချန်ပီယံလိဂ်သွင်းဂိုး (၁၅)ဂိုးအထိ သွင်းယူနိုင်ခဲ့ပြီး စီရော်နယ်လ်ဒို၏ တစ်ရာသီလုံးသွင်းဂိုးစံချိန်ကိုမီရန် (၂)ဂိုးသာ လိုအပ်ခဲ့သည်။
ကိုရိုနာဗိုင်းရပ်စ်ကြောင့် ပြိုင်ပွဲကစားသည့် ပုံစံအပြောင်းအလဲက လီဝန်ဒေါစကီးအား စီရော်နယ်လ်ဒိုကို ကျော်ဖြတ်ရန် အခက်အခဲဖြစ်စေခဲ့သည်ဟုလည်း သုံးသပ်ခဲ့ကြပြီး လီဝန်ဒေါစကီးသည် နှစ်ကျော့ကစားရမည့် ကွာတားဖိုင်နယ်၊ ဆီမီးဖိုင်နယ်ပွဲစဉ်များတွင် တစ်ကျော့သာကစားခဲ့ရခြင်းကြောင့် ယင်းကဲ့သို့ သုံးသပ်ကြခြင်းလည်းဖြစ်သည်။
ဘိုင်ယန်မြူးနစ်အသင်း၏အောင်ပွဲအား ဂျာမနီ၊ အီတလီ၊ စပိန်၊ အင်္ဂလန်၊ ပြင်သစ်တို့အပါအဝင် ဥရောပမီဒီယာများက ချီးကျူးခဲ့ကြပြီး (၁၀)လအတွင်း အသင်းတွင်းပြဿနာများကိုဖြေရှင်းကာ ဥရောပ၏ အကောင်းဆုံးအ သင်းဖြစ်လာစေသည့် အသင်းနည်းပြဖြစ်သူ ဟန်ဆီဖလစ်ခ်ကိုလည်း မှော်ဆရာဆန်ဆန် စွမ်းဆောင်ပေးနိုင်ခဲ့သူဖြစ်ကြောင်း ဂျာမန်မီဒီယာများက ချီးကျူးခဲ့ကြသည်။
စပိန်သတင်းစာ AS က ”ချန်ပီယံလိဂ်ဖလားမှာ PSG အတွက် နေရာမရှိပါဘူး။ ဒီနေရာက ငွေကြေးနဲ့ ဝယ်ယူလို့ရတဲ့နေရာလည်းမဟုတ်ဘူး။ ဒီနေရာက အစဉ်အလာနဲ့ လာရတဲ့နေရာဖြစ်တယ်”ဟု PSG အသင်းကို တိုက်ရိုက်ထိုးနှက်ခဲ့ပြီး၊ ဘိုင်ယန်မြူးနစ်ကသာ ဥရောပ၏ဘုရင်နေရာနှင့် ထိုက်တန်ခဲ့သည်ဟု ချီးကျူးခဲ့သည်။
အမေရိကန်မီဒီယာများကလည်း ဘိုင်ယန်မြူးနစ်အသင်း၏ အောင်မြင်မှုနှင့်ပတ်သက်ပြီး ချီးကျူးဂုဏ်ပြုမှုများပြုလုပ်ခဲ့ရာ ကမ္ဘာကျော် ၀ါရှင်တန်ပို့စ်က ”ကင်စလေကိုးမန်း၊ ပါရီမြို့သား၊ PSG ပါရမီရှင်လူငယ်ဟောင်းရဲ့သွင်းဂိုး၊ နော်ယာရဲ့အံ့မခန်းကာကွယ်မှုတွေနဲ့ ထိုက်တန်တဲ့အောင်ပွဲ”ဟုလည်းကောင်း၊ ESPN ကလည်း ”ဟန်ချက်တွေနဲ့ ရင်းမြစ်တွေနဲ့ တည်ဆောက်ထားတဲ့ အသင်းတစ်သင်းရဲ့အောင်ပွဲမှာ ရှင်းပြစရာစကားလုံးမရှိဘူး”ဟု ချီးကျူးသွားခဲ့သည်။
လက်ရှိအချိန်တွင် Ballon d’Or ဆုကို ပြန်လည်ချီးမြှင့်ရန်အတွက် တိုက်တွန်းမှုများ၊ လက်မှတ်ထိုးတောင်းဆိုရန် စီစဉ်မှုများလည်းရှိနေပြီး၊ ဘိုင်ယန်မြူးနစ်ကစားသမားများသည် ယင်းအခွင့်အရေးကို လက်လွတ်ဆုံးရှုံး ရန်မသင့်ဆိုသည့် ယူဆချက်များလည်းရှိနေသည်။
အထူးသဖြင့် ယခုရာသီတွင် ဘိုင်ယန်မြူးနစ်အသင်းသည် အသင်းသမိုင်းတစ်လျှောက် ဒုတိယမြောက် Treble အောင်မြင်မှုကို ရယူနိုင်ခဲ့ရာတွင် အကောင်းဆုံးကစားခဲ့သည့် လီဝန်ဒေါစကီးအတွက် နစ်နာမှုရှိသည်ဟု ပရိသတ်များက ယူဆနေသည်။
www.change.org မှတစ်ဆင့် လက်မှတ်ထိုးတောင်းဆိုသည့် Bleacher Report ၏ အစီအစဉ်တွင် (၂)နာရီအတွင်း ပရိသတ် (၇၅၀၀၀)က ဝင်ရောက်လက်မှတ်ရေးထိုးခဲ့ကြကြောင်းလည်း သိရသည်။
