PSG အသင်းတိုက်စစ်မှူး မက်ဆီသည် တံကောက်ကြောဒဏ်ရာကြောင့် ဘိုင်ယန်မြူးနစ်အသင်းနှင့်ကစားရမည့် ချန်ပီယံလိဂ်ပွဲတွင် ပါဝင်နိုင်ရန် မသေချာသေးကြောင်း သိရသည်။
မက်ဆီ (၃၅ နှစ်) သည် ဗုဒ္ဓဟူးနေ့က မာဆေးလ်အသင်းအား ရှုံးနိမ့်သည့် ပြင်သစ်ဖလားပွဲစဉ်တွင် ပွဲချိန်ပြည့်ပါဝင်ကစားခဲ့သော်လည်း တံကောက်ကြောဒဏ်ရာရရှိခဲ့ခြင်းဖြစ်ကြောင်း ပြင်သစ်နိုင်ငံထုတ် L’Equipe သတင်းစာက ဖော်ပြခဲ့သည်။
၎င်းအနေဖြင့် ဒဏ်ရာကြောင့် မနေ့က ကစားခဲ့သည့် မိုနာကိုအသင်းနှင့် အဝေးကွင်းပွဲကို လွဲချော်ခဲ့ရပြီး ဘိုင်ယန်မြူးနစ်အသင်းနှင့် ချန်ပီယံလိဂ် အိမ်ကွင်းပွဲအမီ ကြံ့ခိုင်မှုပြည့်ဝလာရန် စောင့်ကြည့်ရဦးမည်ဖြစ်သည်။ မက်ဆီ၏ ဒဏ်ရာပြဿနာမှာ PSG အသင်းနည်းပြ ဂယ်လ်ချီအတွက် ခေါင်းခဲစရာဖြစ်စေပြီး ကြယ်ပွင့်တိုက်စစ်မှူး ဘာပေမှာလည်း ပေါင်ဒဏ်ရာကြောင့် ချန်ပီယံလိဂ်ပွဲကို လွဲချော်မည်ဖြစ်သည်။
PSG အသင်းအနေဖြင့် တိုက်စစ်ပိုင်းတွင် အဓိက ကစားသမား နှစ်ဦးဖြစ်သူ ဘာပေနှင့် မက်ဆီ ဒဏ်ရာပြဿနာကြုံတွေ့နေရသဖြင့် နေမာတစ်ဦးတည်းသာ ကျန်ရှိတော့ပြီး ဖေဖော်ဝါရီ ၁၄ ရက်ကစားရမည့် ဘိုင်ယန်မြူးနစ်အသင်းနှင့်ပွဲအတွက် အခက်တွေ့ဖွယ်ရှိနေသည်။
PSG အသင်းသည် ပြင်သစ်ဖလားပြိုင်ပွဲ ၁၆ သင်းအဆင့်မှ ထွက်ခဲ့ရပြီဖြစ်သလို ယခုနှစ်ဆန်းပိုင်းတွင်ကစားထားသည့် လီဂူး-၁ ပွဲစဉ် ခုနှစ်ပွဲအနက် သုံးပွဲသာ အနိုင်ရပြီး တစ်ပွဲသရေ၊ သုံးပွဲ ရှုံးနိမ့်ထားသည်။
