မန်ယူအသင်းသည် ဘာစီလိုနာအသင်းမှ ဆယ်ကျော်သက်ကြယ်ပွင့်ကစားသမား အန်ဆူဖာတီကို သက်တမ်းတိုးစာချုပ် မချုပ်ဆိုမီခေါ်ယူရန် ပြင်ဆင်နေကြောင်း Mundo Deportivo သတင်းစာက ဖော်ပြခဲ့သည်။
အန်ဆူဖာတီသည် လက်ရှိအချိန်တွင် ဘာစီလိုနာအသင်းနှင့် ယူရိုသန်း(၁၇၀)တန် လျော်ကြေးစာချုပ် ချုပ်ဆိုထားပြီး သက်တမ်းတိုးစာချုပ် ချုပ်ဆိုပြီးပါက ၎င်းအတွက် လျော်ကြေးတန်ဖိုးမှာ ယူရိုသန်း(၄၀၀)သို့ မြင့်တက်သွားမည်ဖြစ်သည်။
ထို့ကြောင့် မန်ယူအသင်းသည် လျော်ကြေးတန်ဖိုးမမြင့်တက်မီ အန်ဆူဖာတီကို ခေါ်ယူရန် ပြင်ဆင်နေခြင်းဖြစ်ပြီး ဆန်ချိုနှင့် အန်ဆူဖာတီတို့အနက် တစ်ဦးဦးကိုရွေးချယ်ရန် စီစဉ်နေကြောင်းလည်း သိရသည်။
လက်ရှိစာချုပ်မှာ ၂၀၂၂ ခုနှစ်တွင် သက်တမ်းကုန်ဆုံးမည်ဖြစ်သောကြောင့် ဘာစီလိုနာက စာချုပ်သက်တမ်းတိုးရန် စီစဉ်သွားမည်ဟုလည်း သတင်းများ ထွက်ပေါ်လျက်ရှိသည်။
(၁၇)နှစ်သာရှိသေးသူ အန်ဆူဖာတီသည် ဘာစီလိုနာအသင်း၏ အနာဂတ်အဖြစ် သတ်မှတ်ခံထားရသော်လည်း ပုံမှန်ပွဲထွက်ခွင့်ရရှိခြင်း မရှိသေးပေ။
၎င်းအနေဖြင့် ယခုရာသီတွင် လာလီဂါပွဲ (၂၄)ပွဲကစားခဲ့ရာတွင် (၇)ဂိုးအထိ သွင်းယူနိုင်ခဲ့ကြောင်း သိရသည်။
ဘာစီလိုနာအသင်းဥက္ကဋ္ဌ ဘာတိုမူကမူ အန်ဆူဖာတီအတွက် ကမ်းလှမ်းမှုများရှိသော်လည်း ရောင်းချမည့်စာရင်းတွင် မပါဝင်ဟု ပြီးခဲ့သည့်ရက်ပိုင်းက အတိအလင်းပြောကြားထားသည်။
