ဘဏ္ဍာရေးအကျပ်အတည်းများနှင့် ရင်ဆိုင်နေရသည့် ဘာစီလိုနာအသင်းသည် လာမည့် ၂၀၂၃ -၂၄ ရာသီတွင် အသင်းကစားသမားများကို လာလီဂါပြိုင်ပွဲ၌ မှတ်ပုံတင်နိုင်ရန်အတွက် အသင်းရှိ ကစားသမားအများအပြားကို ရောင်းထုတ်ရဖွယ်ရှိနေကြောင်း စပိန်မီဒီယာများက ဖော်ပြနေကြသည်။
ဘာစီလိုနာအသင်းဥက္ကဋ္ဌ လာပေါ်တာသည် ပြီးခဲ့သည့်နွေတွင် အသင်းရုပ်သံထုတ်လွှင့်ခွင့် (၂၅) ရာခိုင်နှုန်းနှင့် မီဒီယာလုပ်ငန်း (၂၅)ရာခိုင်နှုန်းကို ယူရို (၆၆၇)သန်းဖြင့် ရောင်းချခဲ့သည်။
ထို့ကြောင့် ဘာစီလိုနာအသင်းသည် ပြီးခဲ့သည့်နွေတွင် လီဝန်ဒေါစကီး၊ ရာဖင်ညာ၊ ခွန်ဒဲတို့အပါအဝင် ကစားသမား (၈)ဦးအထိ ခေါ်ယူခဲ့သည်။ သို့သော် ဘာစီလိုနာအသင်းအနေဖြင့် လာမည့်ရာသီတွင် ဝင်ငွေကျဆင်းတော့မည်ဖြစ်ရာ ဝင်ငွေလိုက်ပြီး လစာပေးချေရသည့် လာလီဂါပြိုင်ပွဲ၏စည်းမျဉ်းအရ လစာငွေပမာဏကိုလည်း လျှော့ချရမည်ဖြစ်သည်။
ဘာစီလိုနာအသင်းသည် လက်ရှိတွင် အသင်းရှိ ကစားသမားများကို တစ်နှစ်လစာပေးချေရမှုမှာ ယူရိုသန်း (၆၀၀)အထိရှိကြောင်း သိရှိရသည်။ လာလီဂါဥက္ကဋ္ဌ တီဘက်စ်၏ ပြောဆိုမှုအရ လက်ရှိပုံစံအတိုင်းဆိုပါက ဘာစီလိုနာအသင်းအနေဖြင့် လာမည့် ၂၀၂၃-၂၄ ရာသီတွင် ကစားသမားများ၏ လစာပမာဏကို ယူရိုသန်း (၂၀၀)ကျော် လျှော့ချရမည်ဖြစ်ကြောင်း သိရသည်။
တီဘက်စ်က “ပီကေးနဲ့ ဒီပိုင်းတို့ ထွက်ခွာသွားတာကြောင့် ဘာစီလိုနာအသင်းဟာ လက်ရှိမှာ လာလီဂါရဲ့လစာကန့်သတ်မှုစည်းမျဉ်းနဲ့ ကိုက်ညီနေပါတယ်။ ဒါပေမဲ့ ဘာလုပ်သင့်တယ်ဆိုတာကို ဘာစီလိုနာတာဝန်ရှိသူတွေ ဆုံးဖြတ်ရမှာပါ။ သူတို့ရဲ့ ဒုဥက္ကဋ္ဌက ကစားသမားလစာပေးချေမှုကို လျှော့ချရမယ်လို့ ပြောထားပါတယ်။ ကျွန်တော့်အထင်တော့ သူတို့အနေနဲ့ လစာပမာဏကို ယူရိုသန်း (၆၀၀)ကနေ ယူရိုသန်း (၄၀၀) ဒါမှမဟုတ် အဲဒီထက်နည်းနည်းပိုပြီး လျှော့ချရမယ်လို့ ထင်ပါတယ်” ဟု ပြောကြားခဲ့သည်။
Cadena SIR ၏ ဖော်ပြမှုအရ ဘာစီလိုနာအသင်းသည် လာမည့်ရာသီနွေတွင်လည်း ကစားသမားများကို မှတ်ပုံတင်နိုင်ရေးအတွက် အသင်းပိုင်ဆိုင်မှုအချို့ကို ရောင်းချဖွယ်ရှိနေကြောင်း သိရှိရသည်။
သို့သော် ပြီးခဲ့သည့် ၂၀၂၂ နိုဝင်ဘာတွင် လာလီဂါက အသင်းပိုင်ဆိုင်မှုများကို ရောင်းရငွေမှ (၅) ရာခိုင်နှုန်းကိုသာ လစာပေးချေမှုတွင် ထည့်သွင်းရမည်ဟု သတ်မှတ်ခဲ့ရာ ဘာစီလိုနာအနေဖြင့် ကစားသမားများကို ရောင်းထုတ်ရဖွယ်ရှိနေသည်။
