ပရီးမီးယားလိဂ်သို့သာ ရာဘီယူပြောင်းရွှေ့ဖွယ်ရှိနေ

ဂျူဗင်တပ်စ်အသင်း၏ ပြင်သစ်လက်ရွေးစင်ကွင်းလယ်လူ ရာဘီယူ (၂၇ နှစ်)သည် စပိန်ထိပ်သီးကလပ်အသင်း (၂)သင်းဖြစ်သည့် ဘာစီလိုနာ၊ အက်သလက်တီကိုတို့၏ စိတ်ဝင်စားမှုကိုငြင်းပယ်ကာ ပရီးမီးယားလိဂ်သို့ပြောင်းရွှေ့ ဖွယ်ရှိနေကြောင်း စပိန်အားကစားသတင်းစာ Football Espana ကဖော်ပြခဲ့သည်။

ရာဘီယူသည် လာမည့် ၂၀၂၃ ခုနှစ်နွေရာသီတွင် ဂျူဗင်တပ်စ်အသင်းနှင့်စာချုပ်သက်တမ်းကုန်ဆုံးမည်ဖြစ်ပြီး အီတလီထိပ်သီးကလပ်နှင့်စာချုပ်သစ် ထပ်မံချုပ်ဆိုမည်မဟုတ်ဘဲ အသင်းပြောင်းရွှေ့ရန် ဆန္ဒရှိနေခြင်းဖြစ်သည်။

၂၀၂၂ ကမ္ဘာ့ဖလားတွင် ပြင်သစ်အသင်းနှင့်အတူ ခြေစွမ်းပြခဲ့သော ရာဘီယူအားခေါ်ယူရန် ဘာစီလိုနာနှင့် အက်သလက်တီကိုတို့မှ စိတ်ဝင်စားနေသော်လည်း ရာဘီယူအနေဖြင့် ၂၀၀၈ ခုနှစ်တွင် မန်စီးတီးအကယ်ဒမီကစားသမားဘဝဖြင့် ဖြတ်သန်းခဲ့ဖူးသော အင်္ဂလန်မြေကို ခြေချရန် စီစဉ်နေခြင်းဖြစ်သည်။

ပရီးမီးယားလိဂ် ထိပ်သီးကလပ်အသင်းတစ်သင်းဖြစ်သည့် မန်ယူအသင်းသည် ပြီးခဲ့သည့်နွေရာသီအပြောင်းအရွှေ့ကတည်းက ရာဘီယူအားခေါ်ယူရန် စီစဉ်ခဲ့ဖူးပြီး လက်ရှိအချိန်တွင် ပြန်လည်ကြိုးပမ်းဖွယ်ရှိရာ ရာဘီယူအနေဖြင့် ပရီးမီးယားလိဂ်သို့ပြောင်းရွှေ့နိုင်ဖွယ်ရှိနေကြောင်း စပိန်မီဒီယာများကဖော်ပြခဲ့သည်။