အာဆင်နယ်နောက်ခံလူဟောင်း မာတင်ကီအွန်က အသင်းတိုက်စစ်မှူး ဂျေးဇူးမှာ ခေါင်းဆောင်ကောင်းတစ်ဦးဖြစ်ပြီး အသင်းအတွက် ခြေစွမ်းပြကစားနေသော်လည်း ဂိုးများသွင်းယူနိုင်ရန် လိုအပ်ကြောင်း သတိပေးပြောကြားခဲ့သည်။
အသက် ၂၅ နှစ်အရွယ်ရှိ ဘရာဇီးလ်တိုက်စစ်မှူး ဂျေးဇူးသည် ပြီးခဲ့သည့်ကြာသပတေးနေ့က ကစားခဲ့သည့် ယူရိုပါလိဂ်အုပ်စုပွဲစဉ် အာဆင်နယ် (၁-၀) FC ဇူးရစ်ပွဲတွင် အာဆင်နယ်အသင်းခေါင်းဆောင်အဖြစ် ပါဝင်ကစားခဲ့သည်။
အဆိုပါပွဲစဉ်တွင် ဂျေး ဇူးအနေဖြင့် ခြေစွမ်းပြကစားနိုင်ခဲ့သော်လည်း ဂိုးသွင်းယူနိုင်ခြင်းမရှိသည့်အတွက် ၎င်း၏ ဂိုးပေါက်ပျောက်မှုမှာ ရှစ်ပွဲအထိ ရှိလာခဲ့ပြီဖြစ်သည်။
ထို့ကြောင့် မာတင်ကီအွန်က ဂျေးဇူး၏ စွမ်းဆောင်ရည်အပေါ် ချီးကျူးခဲ့သော်လည်း ကစားသမားအနေဖြင့် ဂိုးများသွင်းယူနိုင်ရန်လိုအပ်ကြောင်း ပြောကြားခဲ့ခြင်းဖြစ်သည်။
မာတင်ကီအွန်က “ဂျေးဇူးက အာဆင်နယ်အသင်းမှာ အရမ်းတော်တဲ့ ခေါင်းဆောင်တစ်ဦးဖြစ်ပြီး အသင်းရဲ့ စံနမူနာကစားသမားလို့လည်း ထင်ပါတယ်။ ဂျေးဇူးဟာ အာဆင်နယ်အသင်းရဲ့ ကစားကွက်တည်ဆောက်မှုတွေမှာ ပါဝင်သလို တောင်ပံကိုလည်း ထွက်ကစားလေ့ရှိတယ်။ သူ့ရဲ့အားထုတ်မှုအတွက် မေးခွန်းထုတ်စရာမရှိပါဘူး။ ဒါပေမဲ့ ဂျေးဇူးအနေနဲ့ အနှေးအမြန်ဆိုသလို ဂိုးတွေသွင်းနိုင်ဖို့တော့ လိုပါတယ်”ဟု ပြောကြားခဲ့သည်။
ပြီးခဲ့သည့်နွေတွင် မန်စီးတီးမှ အာဆင်နယ်ထံသို့ ပြောင်းရွှေ့လာခဲ့သူ ဂျေးဇူးသည် ယခုရာသီတွင် အာဆင်နယ်အတွက် ပြိုင်ပွဲစုံ ၁၇ ပွဲတွင် ၅ ဂိုးသာ သွင်းယူထားနိုင်သေးသည်။
