စက်တင်ဘာလ ၁၁ ရက်က PSG အသင်းနှင့် ပြင်သစ်လူငယ်တိုက်စစ်မှူး ဘာပေအကြား ဆက်ဆံရေးပြိုကွဲခဲ့ပြီး လာမည့်ဇန်နဝါရီလအပြောင်းအရွှေ့ကာလတွင် အသင်းမှ ထွက်ခွာခွင့်တောင်းဆိုထားကြောင်း သတင်းများထွက်ပေါ်ခဲ့သော်လည်း PSG အသင်း၏ အားကစားဒါရိုက်တာဖြစ်သူ လူးဝစ်ကမ်ပို့စ်က အတိအလင်း ငြင်းဆန်ခဲ့သည်။
PSG အသင်းဥက္ကဋ္ဌ အယ်လ်ခီလိုင်ဖီ၊ အားကစားဒါရိုက်တာ လူးဝစ်ကမ်ပို့စ်နှင့် နည်းပြ ဂယ်လ်ချီသည် စာချုပ်သစ်ချုပ်ဆိုစဉ်က ပေးထားသည့်ကတိကဝတ်များကို ထိန်းသိမ်းခြင်းမရှိဟု ဘာပေက ယူဆနေပြီး ပြီးခဲ့သည့်မေလက PSG အသင်းနှင့် စာချုပ်သစ်ချုပ်ဆိုခြင်းမှာ မှားယွင်းခဲ့သည်ဟု ပြောကြားခဲ့ကြောင်း သတင်းရင်းမြစ်များ၏စကားကို ကိုးကားကာ ESPN သတင်းဌာနက ဖော်ပြခဲ့သည်။
ယင်းအခြေအနေများအပေါ် လူးဝစ်ကမ်ပို့စ်က “ကျွန်တော် အရမ်းပဲ အံ့အားသင့်ရပါတယ်။ ဘာဖြစ်လို့လဲဆိုတော့ နေ့တိုင်း ဘာပေနဲ့ အတူ ဖြတ်သန်းခဲ့လို့ပါ။ ကျွန်တော့်ကိုရော ဥက္ကဋ္ဌကိုပါ ဇန်နဝါရီမှာ အသင်းကထွက်ခွာဖို့ သူ မတောင်းဆိုထားပါဘူး။ ဒါနဲ့ပတ်သက်ပြီး ကျွန်တော်တို့ ရှင်းရှင်းလင်းလင်းဖြစ်စေချင်ပါတယ်။ ဒါက ကြေညာချက်တော့ မဟုတ်ပါဘူး။ ဘင်ဖီကာနဲ့ အရေးပါတဲ့ ချန်ပီယံလိဂ်ပွဲ မတိုင်မီ နာရီအနည်းငယ်အလိုမှာ ဒီသတင်းတွေ ထွက်ပေါ်လာတာ ဖြစ်ပါတယ်” ဟု ကမ်ပို့စ်က RMC Sport သို့ ပြောကြားခဲ့သည်။
ဘာပေသည် PSG အသင်းနှင့် ပြီးခဲ့သည့်မေလကမှ ၂၀၂၅ ခုနှစ် အထိ စာချုပ်သက်တမ်းတိုးထားခြင်းဖြစ်ပြီး စာချုပ်သစ်အရ တစ်ပတ်ပေါင်တစ်သန်းနှင့် စာချုပ်လက်မှတ်ထိုးကြေး ပေါင်သန်း ၁၀၀ ရရှိခဲ့ကြောင်း သိရသည်။
