မန်စီးတီးတိုက်စစ်မှူး အာလင်းဟော်လန်း၏ဖခင်ဖြစ်သူ အယ်လ်ဖီဟော်လန်းက ၎င်း၏သားဖြစ်သူသည် သူ၏အရည်အသွေးကို ဥရောပထိပ်တန်းလိဂ်များတွင် စမ်းသပ်လိုသူဖြစ်ပြီး မန်စီးတီးအသင်းတွင် နှစ်ရာသီခွဲထက် ပိုကစားဖွယ်မရှိကြောင်း ပြောကြားခဲ့သည်။
အသက် ၂၂ နှစ်အရွယ်ရှိ ဟော်လန်းသည် ပြီးခဲ့သည့်နွေရာသီအပြောင်းအရွှေ့ ကာလတွင် ဒေါ့မွန်အသင်းမှ မန်စီးတီးအသင်းထံသို့ ပေါင် ၅၁ ဒသမ ၂ သန်းဖြင့် ပြောင်းရွှေ့လာခဲ့သူဖြစ်သည်။ ၎င်းသည် ယခုရာသီတွင် မန်စီးတီးအသင်းအတွက် ခြေစွမ်းပြကစားနေပြီး အသင်းအတွက် ပရီးမီးယားလိဂ် ခုနစ်ပွဲတွင် ၁၁ ဂိုးအထိ သွင်းယူထားသည်။
ဟော်လန်းသည် မန်စီးတီးအသင်း နှင့် ၂၀၂၇ ဇွန် ၃၀ ရက်အထိ ငါးနှစ်သက်တမ်းရှိ စာချုပ်တစ်ရပ် ချုပ်ဆိုထားသော်လည်း ၎င်း၏ဖခင်ဖြစ်သူ အယ်လ်ဖီဟော်လန်းက သားဖြစ်သူအနေဖြင့် မန်စီးတီးအသင်းတွင် နှစ်ရာသီခွဲထက် ပိုနေဖွယ်မရှိ ကြောင်း “Haaland – The Big Decision” Documentary တွင် ပြောကြားခဲ့သည်။
လိဒ်စ်နှင့် မန်စီးတီးအသင်းတို့တွင် ကစားခဲ့သည့် အယ်လ်ဖီဟော်လန်းက “အာလင်း (ဟော်လန်း) က သူ့ရဲ့အရည်အသွေးကို ဥရောပထိပ်တန်းတွေအားလုံးမှာ စမ်းသပ်ချင်တယ်လို့ ကျွန်တော် ထင်တယ်။ ဒီတော့ သူ့အနေနဲ့ လိဂ်တစ်ခုမှာ အများဆုံးကစားရင် သုံးနှစ်ကနေ လေးနှစ်လောက်အထိ ဖြစ်ပါလိမ့်မယ်။ သူဟာ ဂျာမနီမှာ နှစ်ရာသီခွဲကစားခဲ့ပြီး အင်္ဂလန်မှာလည်း နှစ်နှစ်ခွဲလောက်ပဲ ကစားပါလိမ့်မယ်။ ပြီးတော့ သူ့အနေနဲ့ စပိန်၊ အီတလီ၊ ပြင်သစ်လိဂ်တွေကို ပြောင်းရွှေ့ကစားပါလိမ့်မယ်။ ဒီလိုဖြစ်မလားတော့ ကျွန်တော်တို့ သေချာတော့မသိပါဘူး။ ဒါပေမဲ့ သူ့အနေနဲ့ ဥရောပထိပ်တန်းလိဂ်တွေမှာ သူ့ရဲ့အရည်အသွေးကို စမ်းသပ်ချင်တယ်လို့ ကျွန်တော် ထင်ပါတယ်”ဟု ပြောကြားခဲ့သည်။
နော်ဝေလက်ရွေးစင်တိုက်စစ်မှူး ဟော်လန်းသည် ပရော်ဖက်ရှင်နယ်ကစားသမားဘဝကို နော်ဝေကလပ် Bryne အသင်း၌ ၂၀၁၅ ခုနှစ်တွင် စတင်ခဲ့ပြီး ၂၀၁၇ ခုနှစ်တွင် မိုလ်ဒီအသင်းသို့ ပြောင်းရွှေ့ခဲ့သည်။ ယင်းနောက် ၎င်းသည် ၂၀၁၈ ခုနှစ်တွင် သြစတြီး ယားကလပ် ဆာလ်ဇ်ဘာ့ဂ်အသင်းသို့ပြောင်းရွှေ့ခဲ့ပြီး ယင်းအသင်းတွင် တစ်ရာသီခွဲကစားပြီးနောက် ၂၀၂၀ ဇန်နဝါရီအပြောင်းအရွှေ့ ကာလတွင် ဂျာမန်ကလပ် ဒေါ့မွန်အသင်းသို့ ပြောင်းရွှေ့ခဲ့သည်။
ဒေါ့မွန်အသင်းတွင် နှစ်ရာသီခွဲကစားပြီးနောက် ဟော်လန်းသည် ပြီးခဲ့သည့်နွေရာသီအပြောင်းအရွှေ့ ကာလတွင် အင်္ဂလန်ကလပ် မန်စီးတီးအသင်းထံသို့ ပြောင်းရွှေ့ခဲ့ခြင်းဖြစ်သည်။ အယ်လ်ဖီက ပြီးခဲ့သည့်နွေတွင် သားဖြစ်သူကို ကမ်းလှမ်းခဲ့သည့် ထိပ်တန်းအသင်းများစွာရှိခဲ့ပြီး မန်စီးတီးမှာ အသင့်တော်ဆုံးဖြစ်သဖြင့် ပြောင်းရွှေ့ ခဲ့ခြင်းဖြစ်ကြောင်းလည်း ပြောကြားခဲ့သည်။
