ချန်ပီယံလိဂ်ချန်ပီယံ ရီးယဲလ်မက်ဒရစ်အသင်းသည် လာမည့်နှစ်နွေရာသီတွင် ဒေါ့မွန်အသင်းမှ အင်္ဂလန်လက်ရွေးစင်ကွင်းလယ်လူ ဘယ်လင်ဟမ်အား ခေါ်ယူနိုင်ရန် အဓိကပစ်မှတ်ထား ကြိုးပမ်းဖွယ်ရှိနေကြောင်း သိရသည်။
အသက် ၁၉ နှစ်သာရှိသေးသူ ဘယ်လင်ဟမ်အား ပရီးမီးယားလိဂ်ထိပ်သီးအသင်းများ ဖြစ်သည့် လီဗာပူးလ်၊ မန်စီးတီးအသင်းများမှလည်း စိတ်ဝင်စားနေရာ ရီးယဲလ်အသင်းသည် ယင်းအသင်းများနှင့်အပြိုင် ခေါ်ယူရဖွယ်ရှိသည်။ ဘယ်လင်ဟမ်သည် ဘောလုံး ကမ္ဘာ၏ စိတ်လှုပ်ရှားစရာအကောင်းဆုံးလူငယ်ကစားသမားတစ်ဦးအဖြစ် သတ်မှတ်ခံထားရသူလည်းဖြစ်သည်။
၎င်းင်းသည် ဒေါ့မွန်အသင်းအတွက် ပွဲ ၁၀၀ ပြည့် ကစားထားပြီး နိုင်ငံအသင်းဖြစ်သည့် အင်္ဂလန်အတွက်လည်း ၁၆ ပွဲအထိ ကိုယ်စားပြုခွင့်ရရှိခဲ့သည်။ ယခုတစ်ပတ် နိုင်ငံတကာပွဲများတွင် အင်္ဂလန် အသင်း ရလဒ်မကောင်းခဲ့သော်လည်း ဘယ်လင်ဟမ်မှာ ခြေစွမ်းပြနိုင်မှုကြောင့် ဗြိတိန်မီဒီယာများ၏ချီးကျူးမှု ခံထားရသူလည်း ဖြစ်သည်။
ရီးယဲလ်အသင်းသည် ၂၀၁၉ ခုနှစ် ကတည်းက ဘယ်လင်ဟမ်အား စိတ်ဝင်စားခဲ့ပြီး ပြီးခဲ့သည့်နွေရာသီအပြောင်းအရွှေ့ကာလက မိုနာကိုကွင်းလယ်လူ ချူယာမန်နီအား ခေါ်ယူရန် မသေချာသေးသည့်အချိန်တွင် ဘယ်လင်ဟမ်အား ဆက်သွယ်မှုများ ပြုလုပ် ခဲ့ကြောင်း သိရသည်။
ဘယ်လင်ဟမ်ကို ခေါ် ယူမည့် ကလပ်အသင်းအနေဖြင့် လာမည့်နှစ် နွေရာသီတွင် ပြောင်းရွှေ့ကြေး ပေါင် ၈၃ သန်းဖြင့် ရရှိနိုင်မည်ဖြစ်ပြီး ဒေါ့မွန်အနေဖြင့် ပြောင်းရွှေ့ကြေးကို တစ်လုံးတစ်ခဲတည်း ပေးချေမှသာ ရောင်းချဖွယ်ရှိသည်။
