ယခုနွေတွင် မန်ယူအသင်းမှ မာဆေးလ်အသင်းသို့ တစ်ရာသီအငှားဖြင့် ပြောင်းရွှေ့သွားသည့် အိုင်ဗရီကို့စ်နောက်ခံလူ ဘာယီက မန်ယူအသင်းသည် အင်္ဂလိပ်ကစားသမားများအား မျက်နှာသာပေးလေ့ရှိကြောင်း စွပ်စွဲပြောကြားခဲ့သည်။
ဘာယီသည် ပြီးခဲ့သည့် ၂၀၂၁-၂၂ ရာသီက မန်ယူအသင်းတွင် ပြိုင်ပွဲစုံ (၇)ပွဲသာ ကစားခဲ့ရသည်။ ၎င်းက ”မန်ယူအသင်းအနေနဲ့ အင်္ဂလိပ်ကစားသမားတွေကို မျက်နှာပေးတာမျိုး မလုပ်သင့်ပါဘူး။ ကစားသမားတိုင်းကို အခွင့်အရေး တန်းတူပေးသင့်ပါတယ်။ မန်ယူအဝတ်လဲခန်းမှာ သူတို့နိုင်ငံသားတွေကို ဦးစားပေးတဲ့ခံစားချက်မျိုး ကျွန်တော် ခံစားခဲ့ရပါတယ်။ ချယ်လ်ဆီး ဒါမှမဟုတ် တခြားပရီးမီးယားလိဂ်ထိပ်သီးအသင်းတွေမှာ အဲဒီလိုမဟုတ်ပါဘူး”ဟုဆိုခဲ့သည်။
မန်ယူအသင်းသည် ဘာယီ(၂၈ နှစ်)ကို ၂၀၁၆ ခုနှစ်က ပေါင်သန်း(၃၀)ဖြင့် ခေါ်ယူခဲ့ခြင်းဖြစ်ပြီး နည်းပြ မော်ရင်ဟိုလက်ထက် ပထမဆုံးခေါ်ယူသည့် ကစားသမားလည်းဖြစ်ခဲ့သည်။
