မန်ယူအသင်း၏ ပေါ်တူဂီဝါရင့်တိုက်စစ်မှူး စီရော်နယ်လ်ဒိုသည် ဘွန်ဒစ်လီဂါကလပ် ဒေါ့မွန်အသင်းထံ ပြောင်းရွှေ့ရန် ၎င်း၏ အေးဂျင့်မှတစ်ဆင့် ကမ်းလှမ်းခဲ့သော်လည်း ဒေါ့မွန်အသင်းက ၎င်းကို ခေါ်ယူရန် စိတ်မဝင်စားကြောင်း သိရသည်။
စီရော်နယ်လ်ဒိုသည် မန်ယူအသင်းကို စွန့်ခွာ၍ ကလပ်အသင်းတစ်သင်းသင်းထံ ပြောင်းရွှေ့ရန် စီစဉ်နေသော်လည်း ၎င်း၏ လစာနှုန်းထားကြောင့် မည်သည့်အသင်းကမျှ ခေါ်ယူလိုခြင်းမရှိဘဲ ဖြစ်နေသည်။
ယခုအခါ ၎င်း၏အေးဂျင့် ဂျော့ချ်မန်ဒက်စ်က တိုက်စစ်မှူးသစ် ဟော်လာ ဒဏ်ရာပြဿနာနှင့် ကြုံတွေ့ခဲ့ရသည့် ဒေါ့မွန်အသင်းထံ စီရော်နယ်လ်ဒိုအား ခေါ်ယူရန် ကမ်းလှမ်းခဲ့သော်လည်း မိုဒက်စ်တေးကို ခေါ်ယူထားပြီးဖြစ်သည့် ဒေါ့မွန်အသင်းက ခေါ်ယူလိုခြင်း မရှိဟု တုံ့ပြန်ခဲ့ကြောင်း သိရသည်။
စီရော်နယ်လ်ဒို၏ လစာနှုန်းထားမှာ လက်ရှိဒေါ့မွန်အသင်းမှ လစာအများဆုံးကစားသမားထက်ပင် (၂)ဆခန့်ဖြစ်နေသည့်အတွက် ဒေါ့မွန်အသင်းက မခေါ်ယူလိုခြင်းဖြစ်ကြောင်းလည်း သိရသည်။
မန်ယူအသင်းမှ ထွက်ခွာခွင့်ပြုရန် တောင်းဆိုထားသည့် စီရော်နယ်လ်ဒိုက တန်ဟက်ဂ်က ရောင်းထုတ်လိုခြင်းမရှိခဲ့သော်လည်း လက်ရှိအချိန်တွင်မူ ထွက်ခွာခွင့်ပြုရန် စီစဉ်နေပြီဟု သတင်းထွက်နေသည်။
ယင်းအတွက် ဒေါ့မွန်နှင့် အဆင်မပြေသော်လည်း နောက်တစ်သင်း ထပ်ရှာဖွယ်ရှိကြောင်းလည်း သုံးသပ်နေကြသည်။
