လီဗာပူးလ်အသင်းတွင် ဒဏ်ရာရကစားသမားအရေအတွက် များနေသော်လည်း နွေရာသီအပြောင်း အရွှေ့ကာလမပိတ်ခင် ကစားသမားသစ် ထပ်မံခေါ်ယူဖွယ်မရှိကြောင်း နည်းပြဖြစ်သူ ယာဂန်ကလော့ပ်က အရိပ်အမြွက်ပြောကြားသည်။
လီဗာပူးလ်အသင်း၏ ဒဏ်ရာစာရင်းတွင် ကွင်းလယ်လူ သီယာဂို ထပ်တိုးလာပြီး ဖူလ်ဟမ်အသင်းနှင့် ရာသီအဖွင့်ပွဲစဉ်၌ တံကောက်ကြော ဒဏ်ရာရရှိခဲ့သောကြောင့် လေးပတ်မှ ခြောက်ပတ်အထိ အနားယူရမည် ဖြစ်သည်။ ထို့ပြင် ကွင်းလယ်လူ ချိန်ဘာလိန်မှာ ပေါင်ဒဏ်ရာ၊ နောက်ခံလူ ကိုနာတီမှာ ဒူးဒဏ်ရာကြောင့် ကာလရှည်အနားယူနေရသလို ကွင်းလယ်လူ ကီတာ (အဖျားရောဂါ)၊ နောက်ခံလူ ဆီမီကက်စ် (ကြံ့ခိုင်မှု မပြည့်ဝ)၊ ဂိုးသမား ကယ်လေဟာ (ပေါင်ခြံ)၊ တိုက်စစ်ကစားသမား ဂျိုတာ (ပေါင်)၊ ကွင်းလယ်လူ ကာတစ်ဂျုံးစ် (ခြေသလုံး) တို့မှာလည်း ဒဏ်ရာစာရင်းတွင် ပါဝင်နေသည်။ ၎င်းတို့အနက် ကီတာနှင့် ဆီမီကက်စ်မှာ တနင်္လာနေ့ (ယနေ့) ကစားရမည့် ပဲလေ့စ်နှင့်ပွဲတွင် ပြန်လည်ပါဝင်နိုင်ဖွယ်ရှိနေသည်။
ပဲလေ့စ်နှင့်ပွဲအတွက် သတင်းစာရှင်းလင်းပွဲတွင် ဒဏ်ရာစာရင်းနှင့်ပတ်သက်၍ ကလော့ပ်က “ကျွန်တော့်ကစားသမားတွေရဲ့ အရည်အသွေး၊ ခွန်အားနဲ့ အရေအတွက်ကြောင့် ပျော်ရွှင်ရပါတယ်။ ကျွန်တော်တို့အသင်းမှာ ဒဏ်ရာတွေရှိပါတယ်။ ကစားသမားတွေအနေနဲ့ အချိန်ဘယ်လောက်ကြာကြာ အနားယူရမလဲဆိုတာနဲ့ အဲဒီအတွက် မတူညီတဲ့ ဖြေရှင်းနည်းတွေရှိသလားဆိုတာက အခုအချိန်မှာ မေးရမယ့် မေးခွန်းတစ်ခုပါ။ အဲဒီထဲမှာ ဖြေရှင်းလို့ရတဲ့ နည်းလမ်းတစ်ခုက အပြောင်းအရွှေ့ဈေးကွက်ပါ။ ဒါပေမဲ့ မှန်ကန်တဲ့ ကစားသမားကို ခေါ်ယူနိုင်မှပဲ အပြောင်းအရွှေ့ဈေးကွက်က အဓိပ္ပာယ်ရှိတာပါ။ ကစားသမားတစ်ယောက် မဟုတ်ပါဘူး၊ မှန်ကန်တဲ့ ကစားသမားဖြစ်ဖို့ လိုပါတယ်။ မှန်ကန်တဲ့ကစားသမား ခေါ်ယူနိုင်ခဲ့မယ်ဆိုရင် အဲဒါက အဓိပ္ပာယ်ရှိနိုင်ပါတယ်။ ဒါပေမဲ့ ကျွန်တော်တို့အနေနဲ့ အပြောင်းအရွှေ့ဈေးကွက် ပထမဆုံးနေ့ ဒါမှမဟုတ် ရာသီကြိုကာလ ပထမဆုံးနေ့ကတည်းက အဲဒီလို အမြဲတမ်းလုပ်ခဲ့တာပါ။ တချို့ကိစ္စတွေမှာ အဲဒါက မဖြစ်နိုင်သလို တချို့ ဟာတွေမှာလည်း အရမ်းခက်ခဲပါတယ်။ အဲဒါကြောင့် အများကြီးစဉ်းစားနေဖို့ မလိုပါဘူး။ တခြားဖြေရှင်းနည်းတွေအားလုံးက အသင်းမှာပဲ ရှိပါတယ်။ အခု ကျွန်တော်တို့အသင်းမှာ ဒဏ်ရာပြဿနာတွေ အများကြီးပဲဆိုတာ သေချာပါတယ်။ ဒါပေမဲ့ နာဘီ (ကီတာ) က တနင်္လာနေ့ ပြန်ကစားနိုင်မှာဖြစ်ပြီး ကော့တက်စ် (ဆီမီကက်စ်)ကလည်း ဒီနေ့မှာ ပထမဆုံးအကြိမ် လေ့ကျင့်မှုလုပ်နိုင်ပြီဆိုတော့ သူလည်း ပြန်လာနိုင်ပါပြီ” ဟု ပြောကြားသည်။
ထို့ပြင် ၎င်းက “ကျွန်တော်တို့အတွက် မှန်ကန်တဲ့အဖြေရှိရင် ဖြေရှင်းပြီးသားဖြစ်မှာပါ။ ကျွန်တော်တို့ က ခေါင်းမာတာ မဟုတ်ပါဘူး။ မှန်ကန်တဲ့အရာကိုပဲ လုပ်ချင်တာပါ။ ကျွန်တော်တို့ဆီမှာ တိကျသေချာတဲ့ ကွင်းလယ်ကစားသမားမျိုးမရှိဘူးလို့ လူတွေက ကျွန်တော့်ကိုပြောတဲ့ အချိန်မှာ အဲဒါကို ကျွန်တော် နားမလည်နိုင်ဘူး။ ဘာဖြစ်လို့လဲဆိုတော့ အဲဒီလိုအချက်တွေကို ရှာဖွေနေတယ်ဆိုရင် ခင်ဗျားဆီမှာ အဲဒီအရာတွေ အမြဲတမ်းရှိမနေလို့ပါ” ဟု ဆက်လက်ပြောကြားသည်။
လီဗာပူးလ်အသင်းသည် ရာသီအဖွင့်ပွဲစဉ်အဖြစ် တန်းတက်ဖူလ်ဟမ်အသင်းနှင့် ယှဉ်ပြိုင်ကစားရာ မထင်မှတ်ဘဲ နှစ်ဂိုးစီသရေကျထားသည်။
