မန်ယူအသင်း၏ အင်္ကျီရင်ဘတ်စပွန်ဆာအဖြစ် ရပ်တည်နေသည့် Team Viewer က ၂၀၂၆ ခုနှစ်တွင် သက်တမ်းကုန်ဆုံးချိန်၌ သက်တမ်းတိုးစာချုပ် ချုပ်ဆိုတော့မည်မဟုတ်ဟု ကြာသပတေးနေ့က အတည်ပြုကြေညာခဲ့သည်။
ဂျာမန်နည်းပညာကုမ္ပဏီတစ်ခုဖြစ်သည့် Team Viewer သည် မန်ယူအသင်းနှင့် ၂၀၂၁ ခုနှစ်တွင် စတင်လက်တွဲခဲ့ပြီး ၂၀၂၆ ခုနှစ်အထိ (၅)နှစ်စာချုပ်ချုပ်ဆိုခဲ့ခြင်းဖြစ်သည်။
ယင်းအတွက် တစ်နှစ်လျှင် ပေါင်(၄၇)သန်းနှုန်းဖြင့် (၂၃၅)သန်း ပေးချေခဲ့ရကြောင်း သိရသည်။ ယခုအခါ နှစ်ဦးနှစ်ဖက်ပူးပေါင်းမှု (၁၈)လဝန်းကျင်အကြာမှာပင် သက်တမ်းတိုးတော့မည်မဟုတ်ကြောင်း အတည်ပြုကြေညာခဲ့ခြင်းဖြစ်ပြီး ရှယ်ယာတန်ဖိုးများ ကျဆင်းလာခြင်းကြောင့်ဖြစ်သည်ဟု သိရသည်။
Team Viewer ကုမ္ပဏီ၏ ရှယ်ယာတန်ဖိုးများမှာ (၈%)အထိ ကျဆင်းခဲ့ပြီး မန်ယူအသင်းနှင့် သက်တမ်းတိုးတော့မည်မဟုတ်ဟု ကြေညာပြီးနောက် ပြန်လည်မြင့်တက်လာခဲ့ကြောင်းလည်း Daily Mail က ဖော်ပြခဲ့သည်။
Team Viewer သည် Chevrolet ၏နေရာတွင် ဝင်ရောက်ကာ မန်ယူအသင်း၏ အကျႌရင်ဘတ်စပွန်ဆာအဖြစ် ရပ်တည်ခဲ့ခြင်းဖြစ်ပြီး Chevrolet ထက် သက်သာသော တန်ဖိုးနှုန်းထားဖြင့် လက်တွဲခဲ့ခြင်းလည်းဖြစ်သည်။ မန်ယူအသင်းသည် Chevrolet နှင့် လက်တွဲစဉ်က တစ်နှစ်လျှင် ပေါင် (၆၄)သန်းရရှိခဲ့ပြီး Team Viewer နှင့် လက်တွဲရာတွင်မူ တစ်နှစ် ပေါင်(၄၇)သန်းသာ ရရှိခြင်းဖြစ်သည်။
Team Viewer သည် မန်ယူအသင်းနှင့် လမ်းခွဲရန် ဆုံးဖြတ်ခဲ့ရာတွင် ရှယ်ယာတန်ဖိုး ကျဆင်းခြင်းက အဓိကအချက်ဖြစ်သော် လည်း ယူကရိန်းနိုင်ငံအပေါ် ရုရှားနိုင်ငံ၏ ကျူးကျော်စစ်ဆင်နွှဲမှုနှင့် ကပ်ဘေးအလွန်ကာလတွင် နည်းပညာပစ္စည်းများအား ဝယ်လိုအားကျဆင်းနေခြင်းတို့ကြောင့် ဖြစ်ကြောင်းလည်း သိရသည်။
လက်ရှိအခြေအနေအရ မန်ယူအသင်းသည် စပွန်ဆာအသစ် ရှာဖွေရတော့မည်ဖြစ်ပြီး တန်ဖိုးကြီးစာချုပ်ချုပ်ဆိုနိုင်ရန်အတွက် အသင်း၏စွမ်းဆောင်ရည် တိုးတက်ရန် လိုအပ်ကြောင်း သုံးသပ်မှုများလည်း ရှိနေသည်။
