မန်စီးတီးတိုက်စစ်မှူးသစ် ဟော်လန်းအနေဖြင့် ကွန်မြူနတီဒိုင်းအဖြစ် ကစားခဲ့သည့် လီဗာပူးလ်နှင့်ပွဲတွင် ရုန်းကန်ခဲ့ရပြီးနောက် ပရီးမီးယားလိဂ်တွင် အထိုင်ကျရန် အချိန်ယူရဖွယ်ရှိသည်ဟု အသင်းတိုက်စစ်မှူးဟောင်း အဂွဲရိုးက သူ၏ Twitch Channel တွင် သုံးသပ်ပြောကြားခဲ့သည်။
မန်စီးတီးအသင်းသည် ယခုနွေရာသီအပြောင်းအရွှေ့ကာလတွင် နာမည်ကျော် နော်ဝေတိုက်စစ်မှူး ဟော်လန်းအား ဒေါ့မွန်အသင်းမှ ပေါင် (၅၁) သန်းဖြင့် ခေါ်ယူခဲ့ပြီးနောက် ၎င်းအပေါ် ပရိသတ်များ၏မျှော်မှန်းချက်မှာ လွန်စွာမြင့်မားခဲ့သည်။
သို့သော် ဇူလိုင် (၃၀) ရက်က ကစားခဲ့သည့် ကွန်မြူနတီဒိုင်း လီဗာပူးလ် (၃-၁) မန်စီးတီးပွဲတွင် ဟော်လန်းသည် မန်စီးတီးအသင်းအတွက် ပွဲချိန်ပြည့်ကစားခဲ့သော်လည်း ခြေစွမ်းပြနိုင်ခဲ့ခြင်းမရှိပေ။
ထို့ပြင် ပွဲပြီးခါနီးတွင် (၆) ကိုက်စည်းအတွင်း အပိုင်ကန်သွင်းခွင့်ရသော်လည်း ဟော်လန်း၏ ကန်ချက်မှာ ဘားတန်းထိထွက်ခဲ့ရာ ဘောလုံးပရိသတ်များ၏ ဝေဖန်မှုများနှင့်ပင် ရင်ဆိုင်ခဲ့ရသည်။
မန်စီးတီးအသင်းတွင် ၂၀၁၁ ခုနှစ်မှ ၂၀၂၁ ခုနှစ်အထိ ကစားခဲ့ပြီး ပြိုင်ပွဲစုံ ပွဲ (၃၉၀) တွင် ဂိုး (၂၆၀) အထိ သွင်းယူခဲ့သည့် အာဂျင်တီးနားလက်ရွေးစင်တိုက်စစ်မှူးဟောင်း အဂွဲရိုးက ဟော်လန်းအနေဖြင့် ပရီးမီးယားလိဂ်တွင် ဗန်ဒိုက်တို့ကဲ့သို့ နောက်ခံလူများ ရှိနေသည့်အတွက် ရုန်းကန်ရဖွယ်ရှိသည်ဟု ပြောကြားခဲ့ခြင်းဖြစ်သည်။
၎င်းက ” ဟော်လန်းက ဂျာမနီမှာ ကစားခဲ့တာဆိုတော့ အဲဒီကပုံစံတွေကို သူ နောကျေနေမှာပါ။ ဟော်လန်းက သူ့ကိုယ်သူ တစ်ယောက်တည်းလို့ ထင်မှတ်နေချိန်မှာ ဗန်ဒိုက် ရောက်လာပြီး ပရီးမီးယားလိဂ်က ကြိုဆိုပါတယ်လို့ ပြောသွားခဲ့တယ်”ဟု ပြောကြားခဲ့သည်။
အသက် (၂၂) နှစ်အရွယ်ရှိ ဟော်လန်းသည် ဒေါ့မွန်အသင်းတွင် (၂) ရာသီခွဲကာလအတွင်း ပြိုင်ပွဲစုံ (၈၉) ပွဲတွင် (၈၆) ဂိုး သွင်းယူပေးခဲ့သူ ဖြစ်သည်။
ဟော်လန်းအနေဖြင့် လီဗာပူးလ်နှင့်ပွဲတွင် အပိုင်အခွင့်အရေးကိုလွဲချော်ခဲ့သော်လည်း မန်စီးတီးနည်းပြ ဂွါဒီယိုလာက စိတ်မပူကြောင်း ဆိုခဲ့သလို ကာရေဂါကလည်း ၎င်းဘက်မှ ကာကွယ်ပြောကြားခဲ့သည်။
