မန်ယူအသင်းသည် နည်းပြတန်ဟက်ဂ်၏ နံပါတ် (၁)ပစ်မှတ်ကစားသမားဖြစ်သော ဘာစီလိုနာအသင်းမှ နယ်သာလန်ကွင်းလယ်လူ ဖရန်ကီဒီယွန်းကို ရာသီသစ်မစမီ နောက်ဆုံးအကြိမ် ကမ်းလှမ်းမှုပြုလုပ်သွားရန် စီစဉ်နေပြီး လစာအဖြစ် တစ်ပတ် ပေါင်(၄၅၀၀၀၀)ပေးမည်ဖြစ်ကြောင်း စပိန်မီဒီယာ Sport က ဖော်ပြခဲ့သည်။
မန်ယူအသင်း၏ နည်းပြသစ် တန်ဟက်ဂ်သည် အသင်းအား ပြုပြင်ပြောင်းလဲမှုများစွာ ပြုလုပ်သွားရန် စီစဉ်ခဲ့သော်လည်း လက်ရှိအချိန်အထိ ကစားသမားသစ် (၃)ဦးသာ ခေါ်ယူထားနိုင်ပြီး အဓိကပစ်မှတ်ထားခဲ့သည့် ဖရန်ကီဒီယွန်းနှင့် အေဂျက်စ်တိုက်စစ်မှူး အန်တိုနီတို့ကို ခေါ်ယူနိုင်ခြင်းမရှိသေးပေ။
ဒီယွန်းအတွက် ဘာစီလိုနာအသင်းနှင့် ပြောင်းရွှေ့ကြေး သဘောတူညီမှုရရှိကြောင်း သတင်းထွက်ခဲ့သော်လည်း ကစားသမားက လက်မခံသည့်အတွက် ပျက်ခဲ့ခြင်းဖြစ်ကြောင်း သိရသည်။
ထို့ကြောင့် မန်ယူအသင်းသည် ဒီယွန်းကို ငြင်းပယ်ရခက်စေမည့် လစာနှုန်းထားဖြင့် မက်လုံးပေး၍ နောက်ဆုံးအကြိမ် ကြိုးပမ်းရန်စီစဉ်ခြင်းဖြစ်ပြီး Sport ၏ အဆိုအရ တစ်ပတ်ပေါင်(၄၅၀၀၀၀)ပေးမည့်အပြင် ဘာစီလိုနာအသင်းထံမှ ရရန်ကျန်ရှိနေသော လစာငွေ ပေါင် (၁၇)သန်းကိုပါ ပေးချေသွားရန် စီစဉ်ထားကြောင်း သိရသည်။
မန်ယူအသင်းမှ တာဝန်ရှိသူများသည် ဘာစီလိုနာအသင်း အမေရိကန်ခြေစမ်းခရီးမှ စပိန်သို့ ပြန်လည်ရောက်ရှိချိန်တွင် သွားရောက်တွေ့ဆုံကာ နောက်ဆုံးကမ်းလှမ်းမှု ပြုလုပ်လိမ့်မည်ဖြစ်ကြောင်း၊ မန်ယူအသင်းအနေဖြင့် ရာသီသစ်မစမီ ဒီယွန်းအပါအဝင် ပစ်မှတ်ကစားသမားများကို ခေါ်ယူနိုင်ရန် ကြိုးပမ်းဖွယ်ရှိကြောင်း Daily Mail ကလည်း သုံးသပ်ခဲ့သည်။
မန်ယူအသင်းသည် အေဂျက်စ်တိုက်စစ်မှူး အန်တိုနီကို တိုက်စစ်ပိုင်းအတွက် အားဖြည့်ရန် ဦးစားပေးပစ်မှတ်အဖြစ် သတ်မှတ်ထားသော်လည်း ပြောင်းရွှေ့ကြေး ညှိနှိုင်းမရဖြစ်နေခြင်းဖြစ်သည်။ အေဂျက်စ်အသင်းက အန်တိုနီအတွက် ပြောင်းရွှေ့ကြေးကို ပေါင်သန်း(၈၀)ဝန်းကျင်အထိ အလိုရှိနေပြီး မန်ယူအသင်းက ပေါင်သန်း(၅၀)ဖြင့် ကမ်းလှမ်းခဲ့သည့်အတွက် ပယ်ချခံခဲ့ရခြင်းဖြစ်ကြောင်း သိရသည်။
ထို့ကြောင့် မန်ယူအသင်းအနေဖြင့် ကြေးတိုးမြှင့်၍ ကမ်းလှမ်းရန် စီစဉ်နေသလို၊ ၎င်းကိုမခေါ်ယူနိုင်ခဲ့ပါက စတုဂတ်အသင်းမှ သြစတြီးယားတိုက်စစ်မှူး ကာလာဒီဇစ်နှင့် ဆာလ်ဇ်ဘာ့ဂ်အသင်းမှ ဆလိုဗေးနီးယားတိုက်စစ်မှူး ရှက်ရှကိုတို့ကို ပြောင်းလဲကြိုးပမ်းသွားမည်ဖြစ်ကြောင်း သိရသည်။ ယင်းကစားသမားနှစ်ဦးအတွက် အသုံးပြုရမည့်ပြောင်းရွှေ့ကြေးမှာ အန်တိုနီတစ်ဦးစာ ဝန်းကျင်သာရှိလိမ့်မည်ဟုလည်း Daily Mail က ဖော်ပြခဲ့သည်။
ဒီယွန်းသည် ဘာစီလိုနာအသင်းမှ ထွက်ခွာလိုခြင်းမရှိသော်လည်း ကစားသမားသစ်များစွာ ခေါ်ယူထားသည့် ဘာစီလိုနာအသင်းက ၎င်းကို မဖြစ်မနေရောင်းထုတ်ရမည် ဖြစ်သည့်အတွက် သေချာပေါက်လမ်းခွဲရတော့မည်ဖြစ်ကြောင်း၊ မန်ယူအသင်းသို့ မပြောင်းရွှေ့လိုလျှင်ပင် အသင်းသစ်တစ်သင်း ရှာဖွေရတော့မည်ဖြစ်ကြောင်းလည်း သုံးသပ်မှုများ ရှိနေသည်။
