စီးရီးအေထိပ်သီးကလပ် ဂျူဗင်တပ်စ်အသင်းသည် တိုက်စစ်ပိုင်းကို အားဖြည့်ရန်အတွက် ချယ်လ်ဆီးတိုက်စစ်မှူး ဗာနာနှင့် မန်ယူတိုက်စစ်မှူး မာစီယဲလ်တို့ကို ခေါ်ယူရန် စိတ်ဝင်စားနေကြောင်း သိရသည်။
ဂျူဗင်တပ်စ်အသင်းအနေဖြင့် မိုရာတာ နှင့် နှစ်ရာသီအငှားစာချုပ် သက်တမ်းပြည့်ခဲ့ပြီး ယူရို ၃၅ သန်းနှင့် အပြီးသတ်ခေါ်ယူခွင့် ရှိသော်လည်း ယင်းထက်နည်းပါးသည့်ပမာဏဖြင့်သာ ခေါ်ယူရန် ဆန္ဒရှိနေသည်ဟု Sky Italy က ဖော်ပြခဲ့သည်။ ထို့ကြောင့် မို ရာတာအား အပြီးသတ်ခေါ်ယူမှု အဆင်မပြေလျှင် ဗာနာနှင့် မာစီယဲလ်အား ပြောင်းလဲကြိုးပမ်းရန် စိတ်ဝင်စားနေခြင်းဖြစ်သည်။
ယင်းကစားသမား နှစ်ဦးအနက် ချယ်လ်ဆီးအသင်းတွင် မျှော်လင့်ထားသကဲ့သို့ ခြေစွမ်း မပြနိုင်ဖြစ်နေသည့် ဗာနာမှာ ဂျူဗင်တပ်စ် အသင်းအတွက် ဖြစ်နိုင်ခြေပိုများသည့် အနေအထားရှိသည်။ ဗာနာသည် ၂၀၂၀ ပြည့်နှစ် တွင် လိုက်ပ်ဇစ်အသင်းမှ ပြောင်းရွှေ့လာပြီး နောက် အသင်းအတွက် ပြိုင်ပွဲစုံ ၈၉ ပွဲအထိ ကစားပေးထားသော်လည်း ၂၃ ဂိုးသာ သွင်းယူနိုင်ခဲ့သည်။ ဂျူဗင်တပ်စ်နည်းပြ အယ်လီဂရီသည် သူ၏တိုက်စစ်ပစ်မှတ်စာရင်းတွင်လည်း ဗာနာကို ထိပ်ဆုံးမှထည့်သွင်းထားကြောင်း သိရသည်။
မာစီယဲလ်မှာမူ ပြီးခဲ့သည့် ဇန်နဝါရီလက ဆီဗီလာအသင်းသို့ အငှားမပြောင်းရွှေ့မီ ဂျူဗင်တပ်စ်မှ ခေါ်ယူရန်စိတ်ဝင်စားခဲ့သော်လည်း လက်ရှိ နည်းပြသစ် တန်ဟက်ဂ်လက်ထက် နေရာပိုမိုရလာဖွယ်ရှိနေသဖြင့် မန်ယူအသင်းက ၎င်းကို ဆက်ထိန်းထားနိုင်ရန်မှာ သေချာသလောက်ရှိနေသည်။
