မန်ယူနည်းပြ တန်ဟက်ဂ်သည် ၎င်း၏ နံပါတ်(၁)ပစ်မှတ်အဖြစ် သတ်မှတ်ထားသော ဘာစီလိုနာကွင်းလယ်လူ ဒီယွန်းကို ခေါ်ယူနိုင်ရန်အတွက် အပြောင်းအရွှေ့နောက်ဆုံးနေ့အထိ စောင့်ဆိုင်းသွားလိမ့်မည်ဖြစ်ကြောင်း ဗြိတိန်မီဒီယာများက ဖော်ပြနေကြသည်။
တန်ဟက်ဂ်သည် အေဂျက်စ်အသင်းမှ ကစားသမားများကိုသာမက အေဂျက်စ်ကစားသမားဟောင်းတစ်ဦးဖြစ်သည့် ဒီယွန်းကိုလည်း မန်ယူအသင်းသို့ခေါ်ယူရန် ကြိုးစားခဲ့သော်လည်း ဒီယွန်းက ဘာစီလိုနာအသင်းမှ ထွက်ခွာလိုခြင်းမရှိပေ။
ထို့ကြောင့် ပြောင်းရွှေ့ကြေးနှင့်ပတ်သက်၍ မန်ယူနှင့် ဘာစီလိုနာအသင်းတို့ သဘောတူညီမှုရရှိခဲ့သော်လည်း အပြောင်းအရွှေ့မဖြစ်မြောက်ဘဲ ရပ်တန့်သွားခဲ့ရသည်။
သို့ရာတွင် တန်ဟက်ဂ်သည် ဒီယွန်းအား ခေါ်ယူလိုသည့် အစီအစဉ်ကို လွယ်လွယ်လက်လျှော့မည်မဟုတ်ဘဲ အပြောင်းအရွှေ့နောက်ဆုံးနေ့အထိ စောင့်ဆိုင်းကြိုးစားသွားလိမ့်မည်ဖြစ်ကြောင်း ဗြိတိန်မီဒီယာများက သုံးသပ်ခဲ့ခြင်းဖြစ်သည်။
ဘာစီလိုနာအသင်းက ဘဏ္ဍာရေးအခက်အခဲရှိနေခြင်းကြောင့် ဒီယွန်းကို ရောင်းထုတ်လိမ့်မည်ဟု ထင်ကြေးပေးမှုများလည်းရှိနေသည့်အတွက် အပြောင်းအရွှေ့ဈေး ကွက်ပိတ်သိမ်းချိန်အထိ တန်ဟက်ဂ်က စောင့်ဆိုင်းသွားရန် စီစဉ်နေခြင်းဖြစ်ကြောင်း သိရသည်။
တန်ဟက်ဂ်သည် အေဂျက်စ်တိုက်စစ်မှူး အန်တိုနီကိုလည်း ခေါ်ယူရန် ကြိုးပမ်းနေသည်။
