နောက်ခံလူ ဒီလစ်၏အပြောင်းအရွှေ့နှင့်ပတ်သက်ပြီး ဘိုင်ယန်မြူးနစ်တာဝန်ရှိသူများ၏ လုပ်ကိုင်ဆောင်ရွက်ပုံအပေါ် ဂျူဗင်တပ်စ်ပရိသတ်များ ဒေါသထွက်

ဂျူဗင်တပ်စ်နောက်ခံလူ ဒီလစ်၏အပြောင်းအရွှေ့နှင့် ပတ်သက်ပြီး ဘိုင်ယန်မြူးနစ်အသင်း တာဝန်ရှိသူများ၏ လုပ်ဆောင်ပုံသည် တစ်ဖက်အသင်းအပေါ် လေးစားမှုမရှိသကဲ့သို့ ဖြစ်နေသဖြင့် ဂျူဗင်တပ်စ်ပရိသတ်များက ဒေါသထွက်လျက်ရှိသည်။

ဇူလိုင်လ(၁၆)ရက်က ပြုလုပ်ခဲ့သော ဘိုင်ယန်မြူးနစ်ကစားသမားများအား ပရိသတ်နှင့်မိတ်ဆက်ပွဲတွင် အမှုဆောင်အရာရှိချုပ် အိုလီဗာခန်းနှင့် အားကစားဒါရိုက်တာ ဆာလီဟာမစ်ဇစ်တို့က ဒီလစ်ကို ခေါ်ယူနိုင်ရန်အတွက် ဆွေးနွေးမှုများ ပြုလုပ်နေသည်ဟု အတည်ပြုခဲ့ခြင်းဖြစ်သည်။

ဆာလီဟာမစ်ဇစ်သည် ယခုလအစောပိုင်းက တူရင်မြို့သို့ လာရောက်ပြီး ဂျူဗင်တပ်စ်အသင်း၊ ဒီလစ်၏အေးဂျင့် ပီမန်တာတို့နှင့် ဆွေးနွေးမှုများ ပြုလုပ်ခဲ့ကြသည်။ “ကျွန်တော်တို့ ဆွေးနွေးမှုတွေ ပြုလုပ်နေပါတယ်။ ကစားသမား ကိုယ်တိုင်ကလည်း ဘိုင်ယန်အသင်းကို လာချင်ပါတယ်။ ဆွေးနွေးမှုတွေတော့ ဆက်လုပ်ရဦးမှာပါ။ အဲဒီနောက်မှာတော့ ဘာတွေဖြစ်လာမလဲ မြင်တွေ့ရမှာပါ”ဟု အိုလီဗာခန်းက Blickpunkt Sport သို့ ပြောကြားခဲ့သည်။

ထို့ပြင် ဆာလီဟာမစ်ဇစ်ကလည်း Sky Sports Germany သို့ ဆွေးနွေးမှုများနှင့် ပတ်သက်ပြီး လျှို့ ဝှက်ထားစရာမရှိဟုဆိုပြီး အတည်ပြုခဲ့သည်။

ယင်းအပြုအမူများအပေါ် ဂျူဗင်တပ်စ်ပရိသတ်များက Twitter နှင့် Instagram တွင် ဝေဖန်မှုများ ပြုလုပ်ခဲ့ကြသည်။ ဂျူဗင်တပ်စ်အသင်းသည် ဒတ်ချ်လက်ရွေးစင်နောက်ခံလူ ဒီလစ်၏ ပြောင်းရွှေ့ကြေးအတွက် ယူရိုသန်း (၉၀)နှင့် (၁၀၀)ကြား အလိုရှိနေသော်လည်း ဘိုင်ယန်မြူးနစ်က Add-ons ကြေးများအပါအဝင် ယူရိုသန်း(၆၀)ဖြင့်သာ ကမ်းလှမ်းခဲ့သော ကြောင့် သဘောတူညီမှုရရန် ကြန့်ကြာနေခြင်းဖြစ်သည်။