အင်္ဂလန်နိုင်ငံ၌ ကျင်းပလျက်ရှိသည့် ယူရို-၂၀၂၂ အမျိုးသမီးပြိုင်ပွဲမှာ အုပ်စုပွဲစဉ် နှစ်ပွဲစီသာ ကစားရသေးပြီး လက်ကျန်ပွဲစုစုပေါင်း ၁၅ ပွဲကျန်ရှိနေစဉ်မှာပင် ကွင်းအတွင်း ကြည့်ရှုသည့် ပရိသတ် ၂၄၈၀၇၅ ဦးဖြင့် သမိုင်းတစ်လျှောက် ပရိသတ်အများဆုံး ယူရိုအမျိုးသမီးပြိုင်ပွဲအဖြစ် စံချိန်တင်ခဲ့ကြောင်း သိရသည်။
ကြာသပတေးနေ့က အုပ်စု (D) ပွဲစဉ် (၂) ဒုတိယပွဲအဖြစ် ပြင်သစ်နှင့် ဘယ်လ်ဂျီယံ အသင်းတို့ ယှဉ်ပြိုင်ကစားသည့်ပွဲတွင် ပရိသတ် ၈၁၇၃ ဦး လာရောက်ကြည့်ရှုခဲ့ပြီးနောက် ယခုနှစ် ယူရိုအမျိုးသမီးပြိုင်ပွဲတွင် ကွင်းအတွင်းကြည့်ရှုသည့် ပရိသတ်စုစုပေါင်း မှာ ၂၄၈၀၇၅ ဦးရှိလာခြင်းဖြစ်သည်။ ယင်း ပမာဏမာ ယူရို-၂၀၁၇ ပြိုင်ပွဲတွင် စံချိန်တင်ထားသည့် ပရိသတ် ၂၄၀၀၄၅ ဦးကိုကျော် ဖြတ်၍ သမိုင်းတစ်လျှောက် ပရိသတ်အများဆုံး ယူရိုအမျိုးသမီးပြိုင်ပွဲအဖြစ် စံချိန်တင်ခဲ့ခြင်းဖြစ်သည်။
ယူရို-၂၀၂၂ ပြိုင်ပွဲကို အင်္ဂလန်နိုင်ငံရှိ မြို့ပေါင်းရှစ်မြို့ရှိ ကွင်း ၁၀ ကွင်း၌ ဇူလိုင် ၆ ရက်မှ ၃၁ ရက်အထိ ကျင်းပမည်ဖြစ်ပြီး ဗိုလ်လုပွဲအပါအဝင် လက်ကျန်ပွဲစုစုပေါင်း ၁၅ ပွဲ ကျန်ရှိနေသေးရာ ပရိသတ်ကြည့်ရှုမှုပမာဏမှာ ငါးသိန်းဝန်းကျင်အထိ ရောက်ရှိသွားနိုင် သည်။
ပြိုင်ပွဲ၏ အဖွင့်ပွဲစဉ်အဖြစ် ဇူလိုင် ၆ ရက်က အိုးလ်ထရက်ဖို့ဒ်ကွင်း၌ အိမ်ရှင်အင်္ဂလန်နှင့် သြစတြီးယားအသင်းတို့ ကစားခဲ့သည့်ပွဲတွင်လည်း ပရိသတ် ၆၈၈၇၁ ဦး ကြည့်ရှုခဲ့ပြီး ယူရိုအမျိုးသမီးပြိုင်ပွဲသမိုင်းတစ်လျှောက် ပရိသတ်အများဆုံးပွဲစဉ်အဖြစ် စံချိန်တင်ထားသည်။ ထို့ပြင် အုပ်စု ပွဲစဉ် အဖြစ် ဇူလိုင် ၉ ရက်က လက်ရှိချန်ပီယံ နယ်သာလန်နှင့် ဆွီဒင်အသင်းတို့ ကစားခဲ့သည့်ပွဲကို ပရိသတ် ၂၁၃၄၂ ဦး ကြည့်ရှုခဲ့ပြီး အိမ်ရှင်အသင်းမပါဝင်သည့် ပရိသတ်အများဆုံး အုပ်စုပွဲစဉ်အဖြစ် မှတ်တမ်းဝင်ခဲ့သည်။
အုပ်စုပွဲစဉ် နှစ်ပွဲစီကစားအပြီးတွင် အုပ်စု (A) မှ အိမ်ရှင်အင်္ဂလန်၊ အုပ်စု (B) မှ ဂျာမနီနှင့် အုပ်စု (D) မှ ပြင်သစ်အသင်း တို့ နှစ်ပွဲနိုင်၊ ခြောက်မှတ်စီဖြင့် ကွာတားဖိုင် နယ်တက်ရောက်ခွင့်ရထားသည်။ အုပ်စု တစ်ခုမှ ထိပ်ဆုံးနှစ်သင်းစီ ကွာတားဖိုင်နယ်တက်ခွင့်ရမည်ဖြစ်ပြီး ဗိုလ်လုပွဲကို ဇူလိုင် ၃၁ ရက်တွင် လန်ဒန်မြို့ရှိ ဝင်ဘလေကွင်း၌ ကျင်းပမည်ဖြစ်သည်။
