ရီးယဲလ်အသင်းသည် ဘိုင်ယန်မြူးနစ်အသင်းမှ ဂျာမန်တောင်ပံကစားသမား ဆာနေးကို ခေါ်ယူရန် အခွင့်အရေးရခဲ့သော်လည်း ယခုနွေရာသီတွင် ကစားသမားသစ်ထပ်ခေါ်ရန် အစီအစဉ်မရှိတော့၍ ငြင်းပယ်ခဲ့ကြောင်း သိရသည်။
ဆာနေး(၂၆ နှစ်)သည် ၂၀၂၀ ခုနှစ်တွင် မန်စီးတီးအသင်းမှ ဘိုင်ယန်မြူးနစ်အသင်းသို့ ပြောင်းရွှေ့ခဲ့သူဖြစ်ပြီး ၂၀၂၅ ခုနှစ်အထိ စာချုပ်ချုပ်ဆိုထားသည်။
ဘိုင်ယန်မြူးနစ်အသင်းက တိုုက်စစ်ပိုင်းကို အပြောင်းအလဲပြုလုပ်ရန်အတွက် ၎င်းကို ပြန်လည်ရောင်းထုတ်ရန် ဆန္ဒရှိနေသလို၊ ၎င်းကလည်း အသင်းပြောင်းလဲရန် လိုလားနေသည့်အတွက် ၎င်း၏အေးဂျင့်ဖြစ်သူက ရီးယဲလ်အသင်းထံ ကမ်းလှမ်းခဲ့ခြင်း ဖြစ်ကြောင်း သိရသည်။
သို့သော် ရီးယဲလ်အသင်းသည် ယခု နွေရာသီတွင် ချူယာမန်နီနှင့် ရူဒီဂါတို့ကို ခေါ်ယူခဲ့ပြီးနောက် ကစားသမားသစ် ထပ်မံခေါ်ယူတော့မည်မဟုတ်ဘဲ ကစားသမားရောင်းချမှုသာ ပြုလုပ်သွားတော့မည်ဖြစ်သည့်အတွက် ဆာနေးအတွက် ကမ်းလှမ်းမှုကို ငြင်းပယ်ခဲ့ကြောင်း သိရသည်။
ရီးယဲလ်အသင်းသည် ယခုနွေရာသီတွင် ကစားသမားသစ် နှစ်ဦးသာ ခေါ်ယူထားပြီး ကစားသမားအများအပြားကို အရောင်းစာရင်းတင်ထားသည်။ ရီးယဲလ်အသင်း၏ ဥက္ကဋ္ဌ ဖလော်ရင်တီနိုပီရက်ဇ်သည် ကစားသမားသစ်ခေါ်ယူမှုအတွက် ငွေကြေးသုံးစွဲရာတွင် လူငယ်ကစားသမားများကိုသာ အဓိကထားခြင်းကြောင့် ဆာနေးကို ငြင်းပယ်ခဲ့ခြင်းဖြစ်ကြောင်းလည်း သိရသည်။
ဆာနေးသည် လီဗာပူးလ်အသင်းမှ မာနေကို ဘိုင်ယန်မြူးနစ်အသင်း ခေါ်ယူခဲ့ခြင်းကြောင့် အသင်းပြောင်းရွှေ့ရန်စီစဉ်ခြင်းဖြစ်သလို၊ ရီးယဲလ်အသင်းမှာ ၎င်း၏ အိပ်မက်အသင်း ဖြစ်ကြောင်းလည်း သိရသည်။ ယခု ရီးယဲလ်အသင်းက ငြင်းပယ်ခဲ့သော်လည်း ၎င်းအနေဖြင့် အသင်းသစ်ရှာဖွေနေဆဲဖြစ်ကြောင်းနှင့် ချယ်လ်ဆီးအသင်းက ခေါ်ယူရန် စိတ်ဝင်စားနေကြောင်းလည်း သိရသည်။
