အက်သလက်တီကိုအသင်းနှင့် စာချုပ်သက်တမ်းကုန်ဆုံးခဲ့ပြီဖြစ်သည့် ဥရုဂွေးဝါရင့်တိုက်စစ်မှူး ဆွာရက်ဇ် (၃၅ နှစ်)သည် တောင်အမေရိက ကလပ်အသင်းများ၏ ကမ်းလှမ်းမှုများကို ငြင်းပယ်ထားပြီး ဥရောပထိပ်တန်းလိဂ်ပြိုင်ပွဲများတွင်သာ ဆက်လက်ကစားရန် ဆန္ဒရှိနေကြောင်းသိရသည်။
အေဂျက်စ်၊ လီဗာပူးလ်၊ ဘာစီလိုနာနှင့် အက်သလက်တီကိုအသင်းများတွင်ကစားခဲ့ဖူးသည့် ၀ါရင့်တိုက်စစ်မှူး ဆွာရက်ဇ်အားခေါ်ယူရန် အာဂျင်တီးနားကလပ် ရေးဗားပလိတ်အပါအဝင် တောင်အမေရိက ကလပ်အသင်း (၃)သင်းမှ ကြိုးပမ်းခဲ့သော်လည်း ကစားသမားကိုယ်တိုင်က ပယ်ချခဲ့ခြင်းဖြစ်သည်။
ဆွာရက်ဇ်သည် ဥရုဂွေးလက်ရွေးစင်အသင်းနှင့်အတူ လာမည့် ၂၀၂၂ ကမ္ဘာ့ဖလားတွင် ပါဝင်ယှဉ်ပြိုင်ခွင့်ရရန် ပစ်မှတ်ထားနေပြီး ၎င်းအနေဖြင့် ဥရောပထိပ်တန်းလိဂ်ကလပ်အသင်းများတွင် ကစားနိုင်ဆဲဟုယုံကြည်နေကြောင်းလည်း သိရသည်။
လက်ရှိတွင် ဥရောပထိပ်တန်းလိဂ်ကလပ်အသင်းများထဲမှ ဆွာရက်ဇ်အားခေါ်ယူရန်အတွက် စိတ်ဝင်စားနေသည့် အသင်း (၂)သင်းရှိပြီး ၎င်း၏အသင်းဟောင်းတစ်သင်းဖြစ်သည့် ဒတ်ချ်ကလပ်အေဂျက်စ်နှင့် လီဗာပူးလ်အသင်းဖော်ဟောင်း ဂျရတ်ကိုင်တွယ်နေသည့် ဗီလာအသင်းတို့ဖြစ်ကြောင်း စပိန်မီဒီယာများကဖော်ပြခဲ့သည်။
