ဖီအိုရင်တီးနားအသင်းသည် ရီးယဲလ်မက်ဒရစ်အသင်းမှ ဆားဘီးယားတိုက်စစ်မှူး လူကာယိုဗစ်ကို ပြောင်းရွှေ့ကြေးအလွတ်ဖြင့် ခေါ်ယူခဲ့ပြီး (၂) နှစ်စာချုပ်ချုပ်ဆိုကာ တစ်နှစ်သက်တမ်းတိုးခွင့်ရှိသည့်အချက်ကိုလည်း ထည့်သွင်းခဲ့သည်။
ရီးယဲလ်အနေဖြင့် ယိုဗစ်ကို ပြောင်းရွှေ့ကြေးအလွတ်ဖြင့် လက်လွှတ်ရသော်လည်း အနာဂတ်အပြောင်းအရွှေ့မှ (၅၀)ရာခိုင်နှုန်းအထိ အကျိုးခံစားခွင့်ရှိမည်ဖြစ်သည်။
အသက်(၂၄)နှစ်ရှိ ယိုဗစ်သည် ၂၀၁၉ ခုနှစ်က ဖရန့်ဖတ်အသင်းမှ ပြောင်းရွှေ့ကြေး ပေါင်(၆၂)သန်းဖြင့် ရီးယဲလ်အသင်းသို့ ရောက်ရှိခဲ့သော်လည်း ရုန်းကန်ခဲ့ရကာ ပြိုင်ပွဲစုံ(၅၁) ပွဲသာ ကစားခဲ့ရပြီး (၃)ဂိုးသာ သွင်းယူနိုင်ခဲ့သည်။
ယိုဗစ်အနေဖြင့် ဖီအိုရင်တီးနားအသင်းတွင် (၂)နှစ်စာချုပ်သက်တမ်းအတွက် တစ်နှစ်လစာ ယူရို(၂.၄)သန်း ရရှိမည်ဖြစ်ပြီး တစ်နှစ်သက်တမ်းတိုးလျှင်မူ ယင်းနှစ်အတွက် ယူရို(၅)သန်းအထိ ရရှိသွားမည်ဖြစ်ကြောင်း သိရသည်။
ဖီအိုရင်တီးနားအသင်းသည် အတ္တလန်တာအသင်းမှ အီတလီဂိုးသမား ဂေါ်လီနီကိုလည်း တစ်နှစ်အငှားစာချုပ်ဖြင့် ခေါ်ယူခဲ့ပြီး အပြီးသတ်ဝယ်ယူခွင့်ရှိသည့်အချက်ကို ထည့်သွင်းထားခဲ့သည်။
ဂေါ်လီနီသည် ပြီးခဲ့သည့်ရာသီက ပရီးမီးယားလိဂ်ထိပ်သီးကလပ် စပါးအသင်းတွင် အငှားကစားခဲ့ပြီး ကွန်းဖရန့်လိဂ်နှင့် ပြည်တွင်းဖလားပွဲများတွင် (၁၀)ပွဲသာ ကစားခဲ့ရသည်။
ဂေါ်လီနီအနေဖြင့် ဖီအိုရင်တီးနားအကယ်ဒမီတွင် ဘောလုံးပညာဆည်းပူးခဲ့ပြီး ၂၀၁၂ ခုနှစ်ရောက်မှ မန်ယူအကယ်ဒမီသို့ ပြောင်းရွှေ့ခဲ့ခြင်းဖြစ်သည်။
အသက်(၂၇)နှစ်အရွယ်ရှိ ဂေါ်လီနီသည် ဗီရိုနာ၊ အတ္တလန်တာအသင်းများတွင်လည်း ကစားခဲ့ဖူးပြီး အီတလီလက်ရွေးစင်အသင်းအတွက် (၁)ပွဲသာ ကစားခွင့်ရခဲ့သည်။
