ဘာစီလိုနာအသင်းသည် ၎င်းတို့၏ ကာလရှည်ပစ်မှတ်ဖြစ်သော ဘိုင်ယန်မြူးနစ်အသင်းမှ ပိုလန်ဝါရင့်တိုက်စစ်မှူး လီဝန်ဒေါစကီးအား လာမည့်ရက်ပိုင်းအတွင်း ယူရိုသန်း (၄၀)ဖြင့်နောက်ဆုံး အကြိမ်ကမ်းလှမ်းမည်ဖြစ်ပြီး ဘိုင်ယန်မြူးနစ်အသင်းကမူ ၎င်းတို့၏ အဓိကဂိုးသွင်းစက်ကစားသမားအတွက် ယူရို (၇၅)သန်းအထိအလိုရှိနေကြောင်း စပိန်မီဒီယာများက ဖော်ပြခဲ့ကြသည်။
ဘာစီလိုနာအသင်းသည် အသက် (၃၃)နှစ်အရွယ်ရှိ လီဝန်ဒေါစကီးအားခေါ်ယူရန်အတွက် ပြီးခဲ့သည့် ၂၀၂၁-၂၂ ဘောလုံးရာသီမကုန်ဆုံးမီကတည်းက စတင်စီစဉ်ခဲ့ခြင်းဖြစ်ပြီး (၂)ကြိမ်တိုင်ကမ်းလှမ်းမှု ပြုလုပ်ခဲ့ပြီးဖြစ်ကြောင်းသိရသည်။
သို့သော် ဘိုင်ယန်မြူးနစ်အသင်းအနေဖြင့် ၎င်းတို့၏ အဓိကဂိုးသွင်းစက်ကစားသမားအား ရောင်းချရန်ဆန္ဒမရှိဘဲ ဘာစီလိုနာအသင်း၏ အစောပိုင်း ကမ်းလှမ်းမှု (၂)ကြိမ်ကို ငြင်းဆန်ပယ်ချခဲ့သလို၊ မဖြစ်မနေရောင်းချရမည်ဆိုပါကလည်း နည်းပါးသောဈေးဖြင့် ထွက်ခွာခွင့်ပြုမည်မဟုတ်ကြောင်းတုံ့ပြန်ထားသည်။
လီဝန်ဒေါစကီးသည် ဘိုင်ယန်မြူးနစ်အသင်းနှင့် ဆက်ဆံရေးအဆင် မပြေဖြစ်ခဲ့ပြီးနောက် ယခုရာသီတွင် ဂျာမန်မြေကိုစွန့်ခွာတော့မည်ဟု အတိအလင်းဖွင့်ဟထားသလို ဘာစီလိုနာသို့ ပြောင်းရွှေ့မည်ဟုလည်း ပြောကြားထားသူဖြစ်သည်။
ဘာစီလိုနာအသင်းသည် ဘိုင်ယန်မြူးနစ်နှင့်စာချုပ်သက်တမ်း တစ်နှစ်သာကျန်ရှိတော့သော လီဝန်ဒေါစကီးအား ပထမအကြိမ်တွင် ယူရိုသန်း (၃၀)နှင့် ဒုတိယအကြိမ်တွင် ယူရို (၃၅)သန်းတို့ဖြင့်ကမ်းလှမ်းခဲ့ခြင်းဖြစ်ပြီး ယခုနောက်ဆုံးအကြိမ်တွင် ကြေးတိုးမြှင့်ကမ်းလှမ်းမည်ဖြစ်သော်လည်း ဘိုင်ယန်မြူးနစ်အလိုရှိနေသော ပမာဏနှင့် များစွာကွာဟနေရာ အပြောင်းအရွှေ့ခက်ခဲဖွယ်ရှိနေသေးကြောင်း စပိန်မီဒီယာများကသုံးသပ်ခဲ့ကြသည်။
ဘိုင်ယန်မြူးနစ်အသင်းတာဝန်ရှိသူများသည် လီဝန်ဒေါစကီးအား နောက်ဆုံးအချိန်အထိ အသင်းတွင်ဆက်ရှိစေရန်ကြိုးပမ်းသွားဖွယ်ရှိနေပြီး အသင်း၏အမှုဆောင်ချုပ်ဖြစ်သူ အိုလီဗာခန်းက မိမိတို့အနေဖြင့် တစ်ရာသီဂိုး (၃၀)နှင့် (၄၀)အထိပုံမှန်သွင်းယူပေးနေသော ကစားသမားကို စိတ်ရူးပေါက်မှသာ ရောင်းချမည်ဖြစ်ကြောင်း Amazon Prime သို့ ပြောကြားခဲ့သည်။
