ချယ်လ်ဆီးအသင်း၏ ဥက္ကဋ္ဌအဖြစ် ၂၀၀၃ ခုနှစ်ကတည်းက တာဝန်ယူခဲ့သည့် ဘရုစ်ဘက်ခ်သည် လာမည့် ဇွန်(၃၀)အထိသာ လက်ရှိရာထူးတွင် ဆက်ရှိတော့မည်ဖြစ်ကြောင်း သိရသည်။
ဥပဒေပညာရှင်တစ်ဦးဖြစ်သည့် ဘရုစ်ဘက်ခ်(၇၆ နှစ်)သည် ချယ်လ်ဆီးအသင်းကို ရုရှားသူဌေး အေဘရာမိုဗစ်ချ် ဝယ်ယူခဲ့ချိန်ကတည်းက ဥက္ကဋ္ဌအဖြစ် ဆောင်ရွက်ခဲ့ခြင်းဖြစ် ပြီး ယခုအခါ ချယ်လ်ဆီးအသင်း၏ ပိုင်ရှင်အပြောင်းအလဲကြောင့် ရာထူးမှ ဖယ်ရှားခံရခြင်းလည်းဖြစ်သည်။
ချယ်လ်ဆီးအသင်း၏ ပိုင်ရှင်သစ်ဖြစ်လာသည့် တော့ဒ်ဘိုလီသည် ဇူလိုင် (၁)ရက်နေ့မှစ၍ ချယ်လ်ဆီးအသင်း၏ ဥက္ကဋ္ဌ အဖြစ် ပြောင်းလဲတာဝန်ယူသွားမည်ဖြစ်ပြီး ဘရုစ်ဘက်ခ်ကို အကြီးတန်းအကြံပေးအဖြစ် ပြောင်းလဲတာဝန်ပေးသွားမည်ဖြစ်ကြောင်း သိရသည်။
ဘရုစ်ဘက်ခ်သည် အသင်းပိုင်ရှင် အေဘရာမိုဗစ်ချ်နှင့်အတူ အောင်မြင်မှုများစွာ ရယူနိုင်ခဲ့သူဖြစ်ပြီး ယင်းအတွက် ဂုဏ်ယူမိကြောင်းနှင့် ဥက္ကဋ္ဌရာထူးမှ ဖယ်ရှားပေးသင့်သည့် အချိန်အခါဖြစ်ကြောင်းလည်း ပြောကြားခဲ့သည်။ ချယ်လ်ဆီးအသင်း၏ ပိုင်ရှင်သစ် တော့ဒ်ဘိုလီကလည်း “ချယ်လ်ဆီးအသင်းကို နိုင်ငံတကာမှာရော ပြည်တွင်းမှာပါ အမြင့်ဆုံးအဆင့်ရောက်အောင် ဦးဆောင်ပေးခဲ့တဲ့အတွက် သူ့ကို ကျေးဇူးတင်ပါတယ်” ဟု ပြောကြားခဲ့သည်။
ချယ်လ်ဆီးအသင်း၏ အပြောင်းအရွှေ့များကို ဦးဆောင်နေသည့် ဒါရိုက်တာ ဂရာနော့ဗ်စကီယာမှာလည်း အသင်းနှင့် လမ်းခွဲဖွယ်ရှိနေကြောင်း သိရသည်။
