အင်္ဂလန်လက်ရွေးစင်အသင်း၏ နည်းပြဖြစ်သူ ဆောက်ဂိတ်က အသင်း၏ တိုက်စစ်ကစားသမားနှစ်ဦးဖြစ်သည့် မားကပ်စ်ရပ်ရှ်ဖို့ဒ်နှင့် ဂျေဒင်ဆန်ချိုတို့အနေဖြင့် ၂၀၂၂ ကမ္ဘာ့ဖလားပြိုင်ပွဲဝင် အင်္ဂလန်အသင်းတွင် ပါဝင်လိုပါက အလုပ်များစွာ ကြိုးစားရန်လိုအပ်ကြောင်း သတိပေးပြောကြားခဲ့သည်။
ကမ္ဘာ့ဖလားပြိုင်ပွဲသည် နောက် (၅)လအကြာတွင် ကျင်းပတော့မည်ဖြစ်ပြီး ရပ်ရှ်ဖို့ဒ်နှင့် ဆန်ချိုတို့သည် ယခုအချိန်တွင် အင်္ဂလန်အသင်းအတွက် ပုံမှန်ပွဲထွက်ခွင့်မရဖြစ်နေသည့် ကစားသမားများလည်းဖြစ်သည်။
ရပ်ရှ်ဖို့ဒ်နှင့် ဆန်ချိုတို့သည် ပြီးခဲ့သည့်ရာသီက မန်ယူအသင်းအတွက် ခြေစွမ်းမပြနိုင်ခဲ့သည့် ကစားသမားများဖြစ်သလို၊ အင်္ဂလန်လက်ရွေးစင်အသင်း၏ ပွဲစဉ်များတွင်လည်း ပုံမှန်ပွဲထွက်ခွင့်ပျောက်ဆုံးနေရာ ကမ္ဘာ့ဖလားပြိုင်ပွဲနှင့် လွဲချော်ရမည့် အခြေအနေနှင့်ပင် ရင်ဆိုင်နေရသည်။
ယင်းအတွက်ကြောင့် ဆောက်ဂိတ်က သတိပေးပြောဆိုမှုများ ပြုလုပ်ခဲ့ခြင်းဖြစ်ပြီး “တချို့ကစားသမားတွေက အကောင်းဆုံးအချိန်ကို ရောက်နေကြတယ်။ သူတို့ဟာ ပွဲတွေကို ပုံမှန်ကစားနေကြတဲ့အခါ ခြေစွမ်းပိုင်းကို အမြင့်ဆုံးအဆင့်မှာ ထိန်းထားနိုင်ကြတယ်။ တချို့ကစားသမားတွေက ပွဲတိုင်းကစားချင်တယ်။ သူတို့ရဲ့အကောင်းဆုံးပုံစံကို ထိန်းဖို့အတွက် အဲဒီ Rhythm လိုတယ်။ တချို့ကစားသမားတွေကျတော့ အနားယူချိန်ကောင်းကောင်းလိုတယ်။ အလုံအလောက်နားဖို့ လိုအပ်ကြတယ်။ ဒါပေမဲ့ ပြန်လာတဲ့အချိန်မှာ အကောင်းဆုံးအခြေအနေနဲ့ ပြန်လာနိုင်တယ်။ ရပ်ရှ်ဖို့ဒ်၊ ဆန်ချိုတို့လည်း အကောင်းဆုံးပုံစံနဲ့ ပြန်လာဖို့ ကျွန်တော် မျှော်လင့်ပါတယ်။ ဒါမှ ကမ္ဘာ့ဖလားပြိုင်ပွဲအတွက် အခွင့်အရေးရှိလိမ့်မယ်” ဟုဆိုခဲ့သည်။ ပြီးခဲ့သည့်ရာသီ မန်ယူအသင်းအတွက် ကစားခဲ့သူများထဲတွင် မက်ဂွိုင်းရားတစ်ဦးသာ အင်္ဂလန်အ သင်း၌ နေရာရလျက်ရှိသည်။
