ဘိုင်ယန်မြူးနစ်အသင်းနှင့် စာချုပ်သက်တမ်းတိုးမည်မဟုတ်ဟု လီဝန်ဒေါစကီး အသိပေး

ဘိုင်ယန်မြူးနစ်အသင်း ကြယ်ပွင့်တိုက်စစ်မှူး လီဝန်ဒေါစကီးက အသင်းနှင့် စာချုပ်သစ် ချုပ်ဆိုမည်မဟုတ်ဟု အသိပေးထားပြီ ဖြစ်ကြောင်း Goal အားကစားသတင်းဝက်ဘ်ဆိုက်နှင့် ဂျာမနီနိုင်ငံရှိ Sky သတင်းဌာနတို့ က ဖော်ပြခဲ့ကြသည်။

အသက် ၃၃ နှစ်ရှိပြီဖြစ်သည့် ပိုလန်လက်ရွေးစင်တိုက်စစ်မှူး လီဝန်ဒေါစကီး၏ စာချုပ်သက်တမ်းမှာ တစ်နှစ်သာကျန်ရှိတော့ ပြီး ၂၀၂၃ ခုနှစ်တွင် ကုန်ဆုံးမည်ဖြစ်သည်။ ဘိုင်ယန်မြူးနစ်အသင်းက ၎င်းအား လက်လွှတ်လိုခြင်းမရှိသော်လည်း ကစားသမား ကိုယ်တိုင်ကမူ အသင်း၏ စာချုပ်သစ်ကိစ္စ ဆွေးနွေးမှုအပေါ် ကျေနပ်အားရခြင်းမရှိသလို အတွေ့အကြုံသစ်ရှာဖွေလိုသဖြင့် ထွက်ခွာရန် ဆန္ဒရှိနေခြင်းဖြစ်ကြောင်း သိရသည်။

အနာဂတ်မတည်မငြိမ်ဖြစ်နေသည့် လီဝန်ဒေါစကီးကို ဘာစီလိုနာအသင်းက ခေါ် ယူရန် ပစ်မှတ်ထားနေကြောင်း သတင်းများ ထွက်ပေါ်လျက်ရှိပြီး လာမည့်နှစ်နွေရာသီတွင် ပြောင်းရွှေ့ကြေးမပါဘဲ အလွတ်ထွက်ခွာခြင်းထက် ယခုနွေရာသီမှာပင် ထွက်ခွာနိုင် ကြောင်း Skyသတင်းဌာနက ဖော်ပြခဲ့သည်။ ဘိုင်ယန်မြူးနစ်အသင်း အမှုဆောင်ချုပ် အိုလီဗာခန်းကမူ ယခုနွေရာသီတွင် ထွက်ခွာ ခွင့်ပြုမည်မဟုတ်ကြောင်း ပြီးခဲ့သည့်လက Amazon Prime သို့ ပြောကြားထားသည်။

“တစ်ရာသီကို ဂိုး ၃၀၊ ၄၀ လောက်သွင်းနိုင်တဲ့ ကစားသမားကို ရောင်းချရင် ကျွန်တော်တို့ မိုက်မဲရာကျပါလိမ့်မယ်။ သူ့ရဲ့အနာဂတ်နဲ့ပတ်သက်ပြီး လာမယ့်ရက်သတ္တပတ်တွေမှာ ကျွန်တော်တို့ ဆွေးနွေးသွားမှာပါ။ သူ့ရဲ့စာချုပ်က ၂၀၂၃ ဇွန်လအထိ ကျန်ပါ သေးတယ်။ နောက်တစ်ရာသီ သေချာပေါက် ရှိနေဦးမှာပါ” ဟု အိုလီဗာခန်းက ဆိုသည်။