ဘောလုံးဝေဖန်သူအဖြစ် ဆောင်ရွက်နေသည့် လီဗာပူးလ်နောက်ခံလူဟောင်း ကာရေဂါက မန်စီးတီးအသင်းအနေဖြင့် ဟော်လန်းကို ခေါ်ယူနိုင်ခဲ့သော်လည်း ဖလားအားလုံးရမည်ဟု အာမခံချက်မရှိကြောင်း သုံးသပ်ပြောကြားခဲ့သည်။
မန်စီးတီးအသင်းသည် ဟော်လန်းအား ခေါ်ယူရန် ဒေါ့မွန်အသင်းနှင့် သဘောတူညီမှုရခဲ့ပြီဖြစ်ကြောင်း မေ (၁၀)ရက်တွင် ကြေညာချက်ထုတ်ပြန်ခဲ့သည်။
မန်စီးတီးအနေဖြင့် ဟော်လန်းကို ခေါ်ယူနိုင်ခဲ့ခြင်းမှာ အလွန်ကောင်းသော်လည်း ဂွါဒီယိုလာ၏ နည်းစနစ်ပိုင်းကို ပြောင်းလဲရဖွယ်ရှိကြောင်း ကာရေဂါက သုံးသပ်ခဲ့ခြင်းဖြစ်သည်။
ကာရေဂါက “အရမ်းကောင်းတဲ့ ခေါ်ယူမှုပါ။ မန်စီးတီးအတွက်သာမက ပရီးမီးယားလိဂ်အတွက်ပါ ကောင်းတာပါ။ ဟော်လန်းနဲ့ ဘာပေတို့ဟာ မက်ဆီနဲ့ စီရော်နယ်လ်ဒိုတို့ရဲ့ အရိုက်အရာကို ဆက်ခံမယ့်သူတွေအဖြစ် သတ်မှတ်ခံထားရတာပါ။ သူက ဂိုးတွေ အများကြီးသွင်းပေးနိုင်တဲ့ တိုက်စစ်မှူးဖြစ်ပေမဲ့ သူ့ကို ပိုင်လိုက်တာနဲ့ မန်စီးတီးအသင်း ဖလားအားလုံးရမယ်လို့ အာမခံချက်မရှိပါဘူး။ လက်ရှိ ဂွါဒီယိုလာရဲ့နည်းစနစ်မှာ ဟော်လန်း ပါလာမယ်ဆိုရင် ပြောင်းလဲရမှာဖြစ်ပြီး အဂွဲရိုးရှိတုန်းကလည်း ဒါမျိုး ကျွန်တော်တို့ မြင်ခဲ့ရတယ်” ဟု ဆိုခဲ့သည်။
ဟော်လန်းသည် ဒေါ့မွန်အသင်းတွင် (၂) ရာသီခွဲအတွင်း ပြိုင်ပွဲစုံ (၈၈) ပွဲတွင် (၈၅) ဂိုးအထိ သွင်းယူပေးနိုင်ခဲ့သည်။
