ယူရို-၂၀၂၈ နှင့် ၂၀၃၂ ပြိုင်ပွဲများကို အိမ်ရှင်အဖြစ် လက်ခံကျင်းပရန် ရုရှား လျှောက်ထား

ရုရှားနိုင်ငံသည် လက်ရှိအချိန်တွင် ယူကရိန်းနိုင်ငံအပေါ် ကျူးကျော်စစ် ဆင်နွှဲနေခြင်းကြောင့် ဘောလုံးလောက၌ ပိတ်ဆို့အ ရေးယူမှုများနှင့် ရင်ဆိုင်နေရသော်လည်း ယူရို-၂၀၂၈ နှင့် ယူရို-၂၀၃၂ ပြိုင်ပွဲများကို အိမ်ရှင်အဖြစ် လက်ခံကျင်းပရန် လျှောက်ထားလိုက်ကြောင်း သိရသည်။

ရုရှားနိုင်ငံသည် ၂၀၁၈ ကမ္ဘာ့ဖလား ပြိုင်ပွဲကို အိမ်ရှင်အဖြစ် လက်ခံကျင်းပခဲ့သည့် နိုင်ငံဖြစ်သော်လည်း ကျူးကျော်စစ်ကြောင့် ၂၀၂၂ ကမ္ဘာ့ဖလားခြေစစ်ပွဲကိုပင် ဆက်လက်ယှဉ်ပြိုင်ခွင့် မရရှိခဲ့ပေ။

သို့သော် ၎င်းတို့ က လာမည့် ယူရိုပြိုင်ပွဲများအတွက် အိမ်ရှင်အဖြစ် လက်ခံကျင်းပခွင့်ပြုရန် လျှောက်ထားခဲ့ခြင်းဖြစ်သည်။

ယင်းအခြေအနေနှင့် ပတ်သက်၍ ရုရှားဘောလုံးအဖွဲ့ချုပ်မှ အမှုဆောင် အဖွဲ့ဝင်တစ်ဦးက “ယူရို-၂၀၂၈ နဲ့ ယူရို-၂၀၃၂ ပြိုင်ပွဲတွေကို အိမ်ရှင်အဖြစ် လျှောက်ထားဖို့ အမှုဆောင်အဖွဲ့က ဆုံးဖြတ်ခဲ့ပါတယ်။ ယူရိုပြိုင်ပွဲကို ကျွန်တော်တို့ လက်ခံကျင်းပ သွားချင်ပါတယ်”ဟု ပြောကြားခဲ့သည်။

အဆိုပါပြိုင်ပွဲများအတွက် အိမ်ရှင်ရွေးချယ်မှုကို ၂၀၂၃ တွင် အတည်ပြုမည်ဟု သိရသည်။