အင်္ဂလန်လက်ရွေးစင်အသင်းနည်းပြ ဆောက်ဂိတ်က ဆွစ်ဇာလန်၊ အိုင်ဗရီကို့စ်တို့ နှင့် ခြေစမ်းပွဲကစားမည့် အသင်းလူစာရင်းမှ ချန်လှပ်ခံခဲ့ရသည့် မန်ယူတိုက်စစ်မှူး ရပ်ရှ်ဖို့ဒ် နှင့် မျက်နှာချင်းဆိုင် တွေ့ဆုံဆွေးနွေးသွားမည်ဖြစ်ကြောင်း ပြောကြားခဲ့သည်။
အင်္ဂလန်အသင်းသည် မတ် ၂၆ ရက်တွင် ဆွစ်ဇာလန်၊ မတ် ၂၉ ရက်တွင် အိုင်ဗရီကို့စ်အသင်းတို့နှင့် ဝင်ဘလေကွင်း၌ ခြေစမ်းပွဲများ ကစားမည်ဖြစ်သည်။ အင်္ဂလန်အသင်းနည်းပြ ဆောက်ဂိတ်သည် အဆိုပါခြေစမ်းပွဲများအတွက် အသင်းလူစာရင်းကို ထုတ်ပြန်ရာတွင် နာမည်ကြီးကစားသမားများဖြစ်သည့် မန်ယူတောင်ပံကစားသမား ဆန်ချို၊ မန်စီးတီးနောက်ခံလူ ဝေါ်လ်ကာတို့အပြင် မန်ယူတိုက်စစ်မှူး ရပ်ရှ်ဖို့ဒ်မှာလည်း ချန်လှပ်ခံခဲ့ရသည်။
အသက် ၂၄ နှစ်အရွယ်ရှိ ရပ်ရှ်ဖို့ဒ်သည် အင်္ဂလန်လက်ရွေးစင်အသင်းအတွက် ၄၆ ပွဲ ကစားကာ ၁၂ ဂိုး သွင်းယူပေးထားသူဖြစ်သည်။ သို့သော် ရပ်ရှ်ဖို့ဒ်အနေဖြင့် ယခုရာသီတွင် မန်ယူအသင်း၌ ရုန်းကန်နေရပြီး ပြိုင်ပွဲ စုံ ၂၆ ပွဲတွင် ငါးဂိုးသာ သွင်းယူပေးထားသည်။ ထို့ကြောင့် ရပ်ရှ်ဖို့ဒ်အနေဖြင့် ဆွစ်ဇာလန်၊ အိုင်ဗရီကို့စ်အသင်းတို့နှင့် ကစားမည့် အင်္ဂလန်အသင်းလူစာရင်းမှ ချန်လှပ်ခံခဲ့ရခြင်းဖြစ်သည်။ အင်္ဂလန်အသင်းနည်းပြ ဆောက်ဂိတ်က ရပ်ရှ်ဖို့ဒ်အား မရွေးချယ်ခြင်းမှာ လက်ရှိတွင် အကောင်းဆုံးခြေစွမ်းမပြနိုင်ခြင်းကြောင့်ဖြစ်ပြီး ၎င်းနှင့်တွေ့ဆုံကာ အခြေအနေကို ဆွေးနွေးသွားမည်ဖြစ်ကြောင်း ပြောကြားခဲ့ခြင်းဖြစ်သည်။
ဆောက်ဂိတ်က “အခုအချိန်က သူ့ (ရပ်ရှ်ဖို့ဒ်) အတွက် ခက်ခဲတဲ့ကာလတွေဖြစ်ပါတယ်။ သူ့အနေနဲ့ အကောင်းဆုံး ခြေစွမ်းမပြနိုင်တာက ထင်ရှားပါတယ်။ ဒါကြောင့် သူ့ကို အသင်းလူစာရင်းက ချန်လှပ်ခဲ့တာပါ။ ဒါပေမဲ့ ကျွန်တော့်အနေနဲ့ ဘာတွေဖြစ်နေ တယ်ဆိုတာကို ရပ်ရှ်ဖို့ဒ်နဲ့ မျက်နှာချင်းဆိုင် ဆွေးနွေးသွားဖို့ ရှိပါတယ်။ ဒါက သူ့အတွက် အရေးကြီးတယ်လို့ ကျွန်တော် ထင်ပါတယ်။ ကျွန်တော် ရပ်ရှ်ဖို့ဒ်နဲ့ စကားပြောပြီးပါပြီ။ ဘာတွေဖြစ်နေတယ်ဆိုတာကို သူ နားလည်လိမ့်မယ်လို့ ကျွန်တော် ထင်ပါတယ်”ဟု ပြောကြားခဲ့သည်။
ဆောက်ဂိတ်သည် ရပ်ရှ်ဖို့ဒ်အား ရွေး ချယ်ခဲ့ခြင်းမရှိသော်လည်း မန်ယူအသင်းတွင် အမှားများပြီး ဝေဖန်ခံနေရသည့် နောက်ခံလူ မက်ဂွိုင်းရားကို ရွေးချယ်ခဲ့သည့်အတွက် ဝေဖန်မှုများနှင့် ရင်ဆိုင်နေရသည်။ သို့သော် ဆောက်ဂိတ်က “မက်ဂွိုင်းရားကို အသင်းလူ စာရင်းမှာ မရွေးဘူးလို့ တစ်ခါမှ မတွေးဖူးပါဘူး။ သူက ကျွန်တော်တို့ရဲ့ အကောင်းဆုံးဗဟို နောက်ခံလူတွေထဲက တစ်ဦးဖြစ်ပါတယ်။ ဝေဖန်တာတွေကို ကျွန်တော် ဂရုမစိုက်ပါဘူး”ဟု ပြောကြားခဲ့သည်။
