PSG အသင်းအမာခံပရိသတ်အဖွဲ့တစ်ဖွဲ့ ဖြစ်သည့် The Collectif Ultras Paris (ခေါ် ) CUP အဖွဲ့က PSG အသင်းအနေဖြင့် အစဉ်အလာထက် နာမည်ကျော်ကြားရေးနှင့် အင်္ကျီရောင်းရရေးကို ပိုမိုအလေးထားနေကြောင်း ထုတ်ပြန်ခဲ့သည်။
CUP အဖွဲ့သည် PSG အသင်း အုပ်ချုပ်ရေးပိုင်း တာဝန်ရှိသူများ၏ လုပ်ဆောင်မှုများကို ကျေနပ်ခြင်းမရှိကြောင်း အကြောင်းပြချက်များစွာပါဝင်ခဲ့သည့် ထုတ်ပြန်ချက်တစ်စောင်ကို ဖေဖော်ဝါရီ (၈)ရက်တွင် ၎င်း၏ Twitter တွင် တင်ခဲ့ခြင်းဖြစ်သည်။
CUP အဖွဲ့သည် ”Our patience has limit” (ငါတို့ရဲ့ စိတ်ရှည်သည်းခံမှုက အတိုင်းအတာရှိတယ်) ဆိုသော ဆောင်ပုဒ် ကိုင်ဆောင်ထားသည့် ၎င်းတို့အဖွဲ့၏ဓာတ်ပုံကိုလည်း Twitter တွင် တင်ခဲ့သည်။
CUP အဖွဲ့၏ထုတ်ပြန်ချက်တွင် ”ကလပ်အသင်းက မိမိတို့ အားပေးသည့်အရာများကို လုပ်ဆောင်နေသည်မှာ အချိန်ကာလကြာမြင့်နေပြီဖြစ်ကြောင်း၊ ကလပ်အသင်းအနေဖြင့် ကမ္ဘာလုံးဆိုင်ရာအမှတ်တံဆိပ်အဖြစ် ကျော်ကြားရေးနှင့် အင်္ကျီရောင်းချရေးကို ပိုမိုလိုလားနေပြီး အသင်း၏အမွေအနှစ်၊ အစဉ်အလာများကို မေ့ဖျောက်ထားကြောင်း၊ PSG အသင်းသည် အိမ်ကွင်းပွဲစဉ်များတွင် အဝေးကွင်းအင်္ကျီများကို ဝတ်ဆင်ကစားကာ အသင်းပရိသတ်များကို စော်ကားနေကြောင်း၊ ကလပ်အသင်းသည် နာမည်ကျော်ကစားသမားများစွာကို ခေါ်ယူကာ ပျက်စီးနေသည့် ကလေးဆိုးကြီးကဲ့သို့ဖြစ်နေပြီး အားကစားနှင့်ပတ်သက်သည့် တိကျသည့်အစီအစဉ်မရှိကြောင်း၊ ကလပ်အသင်းအနေဖြင့် ပြည်တွင်းဖလားများကို အလေးထားမှု နည်းပါးလာကြောင်း၊ ကလပ်အသင်းအနေဖြင့် DNA ပျောက်ဆုံးနေခဲ့ပြီး မိမိတို့သိခဲ့သည့် PSG အသင်း မဟုတ်တော့ကြောင်း” ဖော်ပြပါရှိသည်။
ထို့ပြင် CUP က PSG အသင်းအနေဖြင့် ယခုနှစ်ပိုင်းတွင် ကွင်းအတွင်းအောင်မြင်မှုထက် နာမည်ကျော်များပိုင်ဆိုင်ရေးကိုသာ ဂရုစိုက်နေကြောင်းနှင့် လူငယ်များကို နေရာပေးခြင်းမရှိကြောင်းလည်း ဝေဖန်ခဲ့သည်။
