စပိန်တိုက်စစ်ကစားသမား ဖယ်ရန်တောရက်စ်က ဘာစီလိုနာအသင်းသို့ ပြောင်းရွှေ့ခွင့်ရခဲ့ခြင်းမှာ မိမိ၏ကစားသမားဘဝအတွက် ကြီးမားသည့် ခြေလှမ်းတစ်ရပ်ဖြစ်ကြောင်း ပြောကြားခဲ့သည်။
ဘာစီလိုနာအသင်းသည် နည်းပြ ဇာဗီလက်ထက် ပထမဆုံးကစားသမားခေါ်ယူမှုအဖြစ် မန်စီးတီးတောင်ပံကစားသမား ဖယ်ရန်တောရက်စ်ကို ယူရို(၅၅)သန်း+ Add-Ons ကြေး(ယူရို ၁၀ သန်း)ဖြင့် ခေါ်ယူခဲ့ခြင်းဖြစ်ပြီး ယင်းငွေများကို လေးသုတ်ခွဲကာ ပေးချေမည်ဖြစ်ကြောင်း သိရသည်။
ဘာစီလိုနာအသင်းသည် အသက် (၂၁)နှစ်အရွယ်ရှိ ဖယ်ရန်တောရက်စ်ကို ၂၀၂၇ ခုနှစ်၊ ဇွန်လ (၃၀) ရက်အထိ သက်တမ်းရှိ (၅)နှစ်ခွဲသက်တမ်းရှိ စာချုပ်တစ်ရပ် ချုပ်ဆိုခဲ့ပြီး ယူရို(၁)ဘီလီယံတန်ကြေးရှိခဲ့သည့် လျော်ကြေးပမာဏကိုလည်း ထည့်သွင်းချုပ်ဆိုခဲ့ကြောင်း သိရှိရသည်။
ဖယ်ရန်တောရက်စ်က မိမိအနေဖြင့် ဘာစီလိုနာအသင်းတွင် မိမိ၏ကစားသမားဘ၀ ပိုတိုးတက်လာမည် ဟုယုံကြည်ကြောင်း အသင်းဝက်ဘ်ဆိုက်နှင့် ပထမဆုံး အကြိမ်ပြုလုပ်သည့် အင်တာဗျူးတွင် ပြောကြားခဲ့သည်။
ဖယ်ရန်တောရက်စ်က “ဒီလိုကြီးကျယ်ခမ်းနားတဲ့အသင်းကို ပြောင်းရွှေ့ခွင့်ရလို့ ကျွန်တော် အရမ်းဝမ်းသာပါတယ်။ ကမ္ဘာ့အကောင်းဆုံးကလပ်အသင်းတွေထဲက တစ်သင်းဖြစ်တဲ့ ဘာစီလိုနာအသင်းကို အရင်လိုပြန်ဖြစ်အောင် ကူညီရင်းနဲ့ ဘောလုံးသမားတစ်ဦးအနေနဲ့ရော လူပုဂ္ဂိုလ်တစ်ဦးအနေနဲ့ပါ တိုးတက်ရင့်ကျက်လာမယ်လို့ ကျွန်တော် ယုံကြည်ပါတယ်။ ဒီမှာရှိနေတာကို ကျွန်တော် အရမ်းပျော်ပါတယ်။ ကစားသမားဘဝတိုးတက်ဖို့နဲ့ ဂိုးတွေ ဆက်လက်သွင်းယူနိုင်ဖို့အတွက် အခုအပြောင်းအရွှေ့က ကျွန်တော့်ရဲ့ ကစားသမားဘဝအတွက် ကြီးမားတဲ့ခြေလှမ်း တစ်ရပ်လို့ထင်ပါတယ်” ဟု ပြောကြားခဲ့သည်။
ဖယ်ရန်တောရက်စ်သည် ဗလင်စီယာအကယ်ဒမီထွက် ကစားသမားတစ်ဦးဖြစ်ပြီး ၂၀၂၀ နွေရာသီတွင် မန်စီးတီးအသင်းသို့ ပေါင်သန်း (၂၀)ဖြင့် ပြောင်းရွှေ့ခဲ့ကာ ယခုအခါ ဘာစီလိုနာအသင်းသို့ ရောက်ရှိလာခဲ့ခြင်းဖြစ်သည်။
ဘာစီလိုနာအသင်းသည် ဖယ်ရန်တောရက်စ်ကို ဇန်နဝါရီ (၃)ရက်တွင် တရားဝင်မိတ်ဆက်ပွဲနှင့် သတင်းစာရှင်းလင်းပွဲ ပြုလုပ်ပေးသွားမည်ဖြစ်ကြောင်း သိရသည်။
