လာလီဂါကလပ် ဘက်တစ်အသင်း၏ ကလေးများအတွက် ကစားစရာအရုပ်လှူဒါန်းသည့် ခရစ္စမတ်အစီအစဉ်ကို လူမှုကွန်ရက်တွင် ချီးကျူးမှုများစွာ ရှိခဲ့ကြောင်း သိရသည်။
ဘက်တစ်အသင်းသည် ဆိုစီဒက်အသင်းကို (၄-၀)ဂိုးဖြင့် အနိုင်ရခဲ့သည့်ပွဲစဉ်၌ ပထမပိုင်းအပြီး အနားပေးချိန်အတွင်း အဆိုပါအစီအစဉ်ကို ပြုလုပ်ခဲ့ခြင်းဖြစ်သည်။
ဘက်တစ်အသင်းသည် ယခုအစီအစဉ်ကို နှစ်စဉ်ပြုလုပ်သလို၊ ပရိသတ်များကိုလည်း ကြိုတင်အသိပေးထားပြီးဖြစ်သည့်အတွက် ကွင်းအတွင်း လာရောက်အားပေးသည့် ပရိသတ်များက ကစားစရာအရုပ်ကိုယ်စီ ယူဆောင်လာခဲ့ကြပြီး ကွင်းအတွင်းသို့ ပစ်သွင်းကာ လှူဒါန်းခဲ့ကြခြင်းဖြစ်သည်။
အဆိုပါအရုပ်များကို ကွင်းဝန်ထမ်းများနှင့် တာဝန်ရှိသူများက ကောက်ယူသိမ်းဆည်းကာ ကလေးဆေးရုံများ၊ မိဘမဲ့ဂေဟာများမှ ကလေးငယ်များထံ အဓိကလှူဒါန်းသွားမည်ဖြစ်ကြောင်း သိရသည်။
ဘက်တစ်အသင်းတာဝန်ရှိသူများသည် ခရစ္စမတ်ပွဲတော်ကာလအတွင်း ကစားစရာအရုပ်မရှိသည့်ကလေး မရှိစေရဟူသည့် ဆောင်ပုဒ်ဖြင့် ယခုအစီအစဉ်ကို စတင်အကောင်အထည်ဖော်ခဲ့ခြင်းဖြစ်ကြောင်း သိရသည်။
ဆိုစီဒက်နှင့်ပွဲတွင် ယင်းကဲ့သို့ အရုပ်များ ပစ်ချလှူဒါန်းနေသည့် ပုံရိပ်များမှာ ဗီဒီယိုဖိုင်များဖြင့်လည်း ပျံ့နှံ့သွားခဲ့ပြီး အခြားကလပ်အသင်းများအနေဖြင့် လိုက်လံပြုလုပ်သင့်သည့် အစီအစဉ်ကောင်းတစ်ခုဟု တိုက်တွန်းမှုများလည်း ရှိခဲ့သည်။
ယခုအစီအစဉ်တွင် အရုပ်ဒါဇင်ပေါင်းများစွာ ရရှိခဲ့ကြောင်း သိရသည်။
