ဒေါ့မွန်အသင်း၏ နော်ဝေလက်ရွေးစင်တိုက်စစ်မှူး ဟော်လန်း (၂၁ နှစ်)သည် လာမည့်နွေရာသီတွင် ဒေါ့မွန်အသင်းမှထွက်ခွာရန် စီစဉ်နေပြီး ရီးယဲလ်အသင်းသို့ပြောင်းရွှေ့ရန် ဆန္ဒရှိနေကြောင်း စပိန်မီဒီယာများက ဖော်ပြခဲ့သည်။
ဒေါ့မွန်အသင်းအတွက် ဘွန်ဒစ်လီဂါပွဲ (၅၀)ကစားရာတွင် ဂိုး (၅၀)သွင်းယူကာ စံချိန်တင်ခဲ့သည့် ဟော်လန်းသည် ကစားသမားဘဝစိန်ခေါ်မှုအသစ်များအတွက် ဒေါ့မွန်မှထွက်ခွာရန် စီစဉ်နေပြီး ယင်းကဲ့သို့ထွက်ခွာဖြစ်ခဲ့ပါက ရီးယဲလ်မက်ဒရစ်အသင်းမှာ ၎င်း၏ပထမဦးစားပေးရွေးချယ်မှုဖြစ်ကြောင်း စပိန်အားကစားသတင်းစာ Football Espana ကဖော်ပြခဲ့သည်။
ထို့ပြင်ဟော်လန်းအားခေါ်ယူရန်အတွက် ဘာပေအား ရီးယဲလ်အသင်းထံ လက်လွှတ်ရဖွယ်ရှိနေသည့် PSG အသင်းကလည်းစိတ်ဝင်စားနေပြီး မန်ယူအသင်းကလည်း စောင့်ကြည့်လျက်ရှိကြောင်း သိရသည်။
ဟော်လန်းသည် လက်ရွေးစင်အသင်းဖြစ်သည့် နော်ဝေအသင်းနှင့် ကမ္ဘာ့ဖလားခြေစစ်ပွဲ မအောင်မြင်ခဲ့သလို၊ ဒေါ့မွန်အသင်းမှာလည်း ချန်ပီယံလိဂ်အုပ်စုအဆင့်မှ ထွက်ခွာခဲ့ရသည့်အတွက် ပြိုင်ပွဲကြီးများတွင် အောင်ပွဲများရယူနိုင်ရန် အသင်းပြောင်းရွှေ့လိုနေကြောင်း စပိန်မီဒီယာများက ဖော်ပြခဲ့ကြသည်။
