ရုရှားကလပ် စပါးတပ်မော်စကိုအသင်းတွင် ကစားနေသည့် နယ်သာလန်လက်ရွေးစင် တိုက်စစ်ကစားသမား ပရိုမက်စ်သည် လူသတ်ရန်ကြိုးပမ်းမှု၊ ပြင်းထန်စွာ ကိုယ်ထိလက်ရောက်ကျူးလွန်မှုဖြင့် တရားစွဲဆိုခံရမည်ဖြစ်ကြောင်း သိရသည်။
အသက် ၂၉ နှစ်ရှိပြီဖြစ်သည့် ပရိုမက်စ်သည် ပြီးခဲ့သည့်နှစ် ဇူလိုင်က နယ်သာလန် နိုင်ငံ Abcoude မြို့၌ ပြုလုပ်သည့် မိသားစု ပါတီပွဲတစ်ခုတွင် ဆွေမျိုးတော်စပ်သူတစ်ဦး ကို ဓားထိုးမှုဖြင့် ဖမ်းဆီးခံခဲ့ရဖူးသည်။ ၎င်းသည် နှစ်ရက်အကြာတွင် ပြန်လည်လွတ် မြောက်ခဲ့သော်လည်း ယခုအခါ အမ်စတာဒမ်ရှိ အများပြည်သူဆိုင်ရာ တရားစွဲဆိုခြင်းဝန်ဆောင်မှုဌာနက ပရိုမက်စ်အနေဖြင့် လူသတ်ရန် ကြိုးပမ်းခဲ့ကြောင်း အတည်ပြုခဲ့သောကြောင့် တရားရင်ဆိုင်ရတော့မည်ဖြစ် သည်။
ပရိုမက်စ်သည် လူသတ်ရန်ကြိုးပမ်းမှု၊ ပြင်းထန်စွာကိုယ်ထိလက်ရောက်ကျူးလွန်မှုတို့ဖြင့် တရားစွဲဆိုခံရမည်ဖြစ်ပြီး များစွာသော မျက်မြင်သက်သေများရှေ့မှောက်တွင် ဓားထိုးမှု ကျူးလွန်ခဲ့ခြင်းဖြစ်ကြောင်း စွပ်စွဲခံထားရသည်။ ၎င်း၏တိုက်ခိုက်ခြင်းခံခဲ့ရသူမှာ အသက်အန္တရာယ် လွတ်မြောက်ခဲ့သော်လည်း ပြင်းထန်သည့် ဒူးဒဏ်ရာရရှိခဲ့ကြောင်း သိရသည်။
တရားရုံးတွင် ကြားနာစစ်ဆေးမည့်ရက်ကို ထုတ်ပြန်ခြင်းမရှိသေးသော်လည်း ၎င်းအား တရားစွဲဆိုမည့်အကြောင်းကို ရှေ့နေများထံ အကြောင်းကြားထားပြီးဖြစ်ကြောင်း အစိုးရရှေ့နေအဖွဲ့က အတည်ပြုပြောကြားခဲ့သည်။ ပရိုမက်စ်အနေဖြင့် ယင်းဖြစ်ရပ်အတွက် အပြစ်ကျူးလွန်ကြောင်း ထင်ရှားပါက ထောင်ဒဏ် ၄၂ လ (သုံးနှစ်ခွဲ) နှင့်အထက် ပြစ်ဒဏ်ချမှတ်ခံရနိုင်ကြောင်း သတင်းဌာနများက သုံးသပ်ဖော်ပြလျက်ရှိသည်။
လက်ရှိ အချိန်တွင် အမှုကြားနာစစ်ဆေးမည့်ရက် သတ်မှတ်ရခြင်းမရှိသေးသောကြောင့် ပရိုမက်စ်အနေဖြင့် စပါးတပ်မော်စကိုအသင်းအတွက် ဆက်လက်ကစားခွင့်ရမည်ဖြစ်သော်လည်း နယ်သာလန်လက်ရွေးစင်အသင်းနည်းပြ လူးဝစ်ဗန်ဟားလ်ကမူ အမှုအခင်းကိစ္စ ရှင်းလင်းမှသာ ပြန်လည်ရွေးချယ်မည်ဖြစ်ကြောင်း ပြောကြားထားသည်။
ပရိုမက်စ်သည် နယ်သာလန်ကလပ် တွမ်တီးအသင်းအကယ်ဒမီမှ ထွက်ပေါ်လာသူဖြစ်ပြီး တွမ်တီး၊ Go Ahead Eagles (အငှား)၊ စပါးတပ်မော်စကို၊ ဆီဗီလာ၊ အေဂျက်စ် စသည့်အသင်းများတွင် ကစားခဲ့ဖူးသည်။ ၎င်းသည် ပြီးခဲ့သည့် ဖေဖော်ဝါရီတွင် စပါးတပ်မော်စကိုအသင်းသို့ ဒုတိယအကြိမ် ပြောင်းရွှေ့ကစားနေခြင်းဖြစ်ပြီး နယ်သာလန် လက်ရွေးစင်အသင်းအတွက်လည်း ပွဲ ၅၀ ကစား ခုနစ်ဂိုးသွင်းယူပေးထားသည်။
