ဘာစီလိုနာနည်းပြသစ် ဇာဗီသည် ဘိုင်ယန်မြူးနစ်တောင်ပံကစားသမား ကင်စလေကိုးမန်းနှင့် ချယ်လ်ဆီးကွင်းလယ်တိုက်စစ်ကစားသမား ဇီယာ့ရှ်တို့ကို ခေါ်ယူရန် အလိုရှိနေကြောင်း သိရသည်။
ဘာစီလိုနာနည်းပြရာထူးမှ ထုတ်ပယ်ခံခဲ့ရသည့် ရော်နယ်လ်ကိုးမန်း၏နေရာတွင် အစားထိုးခန့်အပ်ခံခဲ့ရသူ ဇာဗီသည် ဘာစီလိုနာအသင်းကို ပြန်လည်တည်ဆောက်ရန် ကြိုးပမ်းလျက်ရှိနေသည်။
စပိန်အားကစားသတင်းစာ Diario Sport ၏ ဖော်ပြချက်အရ ဇာဗီသည် လာမည့်ဇန်နဝါရီအပြောင်းအရွှေ့စျေးကွက်တွင် ဇီယာ့ရှ်နှင့် ကင်စလေကိုးမန်းတို့ကို ခေါ်ယူရန်ပစ်မှတ်ထားနေကြောင်း သိရသည်။
ကင်စလေကိုးမန်းနှင့် ဇီယာ့ရှ်တို့သည် သက်ဆိုင်ရာကလပ်အသင်းများတွင် ပုံမှန်ပွဲထွက်ခွင့်ရရန် ရုန်းကန်နေပြီး အသင်းမှထွက်ခွာဖွယ်ရှိသည်ဟု သတင်းများထွက်ပေါ်နေသည်။
ဘာစီလိုနာအသင်းသည် လာမည့်ဇန်နဝါရီအပြောင်းအရွှေ့စျေးကွက်တွင် ကစားသမားအပြောင်းအရွှေ့အတွက် ယူရို(၁၀)သန်းသာ သုံးစွဲနိုင်မည်ဟု ဥရောပမီဒီယာများက ဖော်ပြနေကြသည်။
သို့သော် ဇာဗီသည် ဖရန်ကီဒီယွန်းအပါအဝင် အသင်းကစားသမားအချို့ကို ရောင်းထုတ်ကာ အသင်းအတွက် အကျိုးပြုနိုင်မည့် ကစားသမားများ ခေါ်ယူရန် စီစဉ်လျက်ရှိကြောင်း သိရသည်။
