လီဗာပူးလ်နည်းပြရာထူးအတွက် ဗီလာအသင်းကို စတီဗင်ဂျရတ် ကိုင်တွယ်ခဲ့ခြင်းဖြစ်သည်ဟု ဂျွန်ဘန်းစ် သုံးသပ်

ESPN ရုပ်သံ ဘောလုံးဝေဖန်သူအဖြစ် ဆောင်ရွက်နေသည့် လီဗာပူးလ်ဂန္ထဝင်တစ်ဦးဖြစ်သူ ဂျွန်ဘန်းစ်က စတီဗင်ဂျရတ်အနေဖြင့် အက်စတွန်ဗီလာနည်းပြရာထူးကို လက်ခံခဲ့ ခြင်းမှာ အနာဂတ်တွင် လီဗာပူးလ်အသင်း နည်းပြရာထူးကို ရယူလိုခြင်းကြောင့် ဖြစ်သည်ဟု သုံးသပ်ပြောကြားခဲ့သည်။

အသက် ၄၁ နှစ်အရွယ်ရှိ လီဗာပူးလ်ဂန္ထဝင် စတီဗင်ဂျရတ်သည် နိုဝင်ဘာ ၁၁ ရက် တွင် အက်စတွန်ဗီလာအသင်းနည်းပြအဖြစ် သုံးနှစ်ခွဲစာချုပ်ဖြင့် ခန့်အပ်ခံခဲ့ရသည်။ အက်စတွန်ဗီလာအသင်းသည် ဂျရတ်ကို နည်းပြအဖြစ် ခန့်အပ်ခဲ့ခြင်းအတွက် ၎င်း၏အသင်းဟောင်း ရိန်းဂျားစ်ကို ပေါင် သုံးသန်းဝန်းကျင် လျော်ကြေးပေးခဲ့ရကြောင်း သိရသည်။

စတီဗင်ဂျရတ်သည် လီဗာပူးလ်အသင်းတွင် နည်းပြ ယာဂန်ကလော့ပ်၏နေရာကို ဆက်ခံမည့်သူဟု သုံးသပ်ခံနေရပြီး ယခု အက်စတွန်ဗီလာအသင်းကို ကိုင်တွယ်ခဲ့ခြင်းမှာ လီဗာပူးလ်နည်းပြရာထူးအတွက် ခုတုံးသဘောမျိုးဖြစ်ကြောင်း ဂျွန်ဘန်းစ်က သုံးသပ်ခဲ့ခြင်းဖြစ်သည်။

ဂျွန်ဘန်းစ်က “ပရီးမီးယားလိဂ်က နည်းပြတွေ အရမ်းအလုပ်လုပ်ချင်တဲ့ ပြိုင်ပွဲတစ်ခုဖြစ်ပါတယ်။ လီဗာပူးလ်နည်းပြရာထူး ကို ဂျရတ် ဘယ်လောက်အထိ လိုချင်တယ်ဆိုတာကို လူတိုင်း သိပါတယ်။ ဒါပေမဲ့ လာမယ့် နှစ်နှစ် ဒါမှမဟုတ် သုံးနှစ်အတွင်း လီဗာပူးလ်အသင်းကို ကိုင်တွယ်ဖို့ မဖြစ်နိုင်သေးချိန်မှာ အက်စတွန်ဗီလာအသင်းကို ဂျရတ် ရွေးချယ်ခဲ့တာပါ”ဟု ပြောကြားခဲ့သည်။

လက် ရှိ လီဗာပူးလ်နည်းပြ ယာဂန်ကလော့ပ်သည် ၂၀၂၄ ခုနှစ်တွင် အသင်းနှင့်စာချုပ်သက်တမ်းကုန်ဆုံးမည်ဖြစ်ကြောင်း သိရသည်။