ဘာစီလိုနာအသင်းနည်းပြသစ် ဇာဗီ အနေဖြင့် လာမည့်ဇန်နဝါရီအပြောင်းအရွှေ့ စျေးကွက်တွင် ကစားသမားသစ်ခေါ်ယူရေးအတွက် ယူရို ၁၀ သန်းဝန်းကျင်ခန့်သာ ရရှိမည်ဖြစ်ကြောင်း ESPN သတင်းဌာနက ဖော်ပြခဲ့သည်။
ဘာစီလိုနာအသင်းသည် လာလီဂါပြိုင်ပွဲ လစာကန့်သတ်မှုစည်းမျဉ်းအရ ယခုရာသီတွင် ယူရို ၉၇ သန်းသာ အသုံးပြုခွင့်ရထားပြီး ယခင်က လာမည့်ဇန်နဝါရီအပြောင်း အရွှေ့ကာလတွင် ကစားသမားသစ်ခေါ်ယူရေးအတွက် ယူရိုသန်း ၂၀ အသုံးပြုရန် လျာထားခဲ့သည်။
သို့သော် ဘာစီလိုနာအသင်းအနေဖြင့် အသင်း၏ နာမည်ကျော်လူငယ်ကစားသမားများဖြစ်သည့် ပတ်ဒရီနှင့် အန်ဆူ ဖာတီတို့ကို စာချုပ်သစ်များ ချုပ်ဆိုခဲ့ခြင်း၊ ရော်နယ်လ်ကိုးမန်းကို နည်းပြရာထူးမှထုတ်ပယ်ရာတွင် လျော်ကြေးပေးခဲ့ရခြင်း၊ ဇာဗီကို နည်းပြအဖြစ်ခန့်အပ်ရာတွင် အယ်လ်ဆတ်ဒ် အသင်းကို လျော်ကြေးပေးခဲ့ရခြင်းတို့ကြောင့် လာမည့်ဇန်နဝါရီအပြောင်းအရွှေ့စျေးကွက်အတွက် အသုံးစရိတ် လျော့ကျခဲ့ခြင်းဖြစ်ကြောင်း သိရသည်။
အသက် ၄၁ နှစ်အရွယ်ရှိ ဇာဗီသည် နိုဝင်ဘာ ၈ ရက်တွင် ဘာစီလိုနာနည်းပြအဖြစ် ခန့်အပ်ခံခဲ့ရပြီး နောက်တစ်ရက်အကြာဖြစ်သည့် နိုဝင်ဘာ ၉ ရက်တွင် အသင်းလေ့ကျင့် ရေးအစီအစဉ်ကို စတင်ပြုလုပ်ခဲ့သည်။ လက်ရှိ နိုင်ငံတကာရက်သတ္တပတ်အတွင်း ဇာဗီသည် အသင်းတာဝန်ရှိသူများနှင့် လာမည့် ဇန်နဝါရီအပြောင်းအရွှေ့ကာလတွင် အသင်းကိုအင်အားဖြည့်တင်းရန်အတွက် ဆွေးနွေးသွားမည်ဖြစ်ကြောင်း သိရှိရသည်။
ဘာစီလိုနာအသင်းတိုက်စစ်ပိုင်းတွင် အဂွဲရိုး၊ ဘရေ့ဝိတ်၊ အန်ဆူဖာတီနှင့် ဒမ်ဘီလီတို့မှာ ယခု ရာသီတွင် ဒဏ်ရာပြဿနာများနှင့် ကြုံတွေ့ နေရပြီး ဇာဗီအနေဖြင့် တိုက်စစ်ကစားသမား ခေါ်ယူသွားရန် ရှိနေကြောင်း စပိန်မီဒီယာများက ဖော်ပြနေကြသည်။
သို့သော် ဘာစီလိုနာနည်းပြသစ် ဇာဗီအနေဖြင့် လာမည့် ဇန်နဝါရီအပြောင်းအရွှေ့စျေးကွက်တွင် ယူရို ၁၀ သန်းဝန်းကျင်ခန့်သာ အသုံးစရိတ်ရဖွယ် ရှိနေရာ ကစားသမားသစ်များကို ငွေကြေး များစွာဖြင့် ခေါ်ယူနိုင်မည်မဟုတ်ဘဲ အငှား ခေါ်ယူခြင်း၊ ကစားသမားအလဲအထပ် ပြုလုပ်ခြင်းများသာ ပြုလုပ်ရဖွယ်ရှိနေကြောင်း သိရှိရသည်။
ဘာစီလိုနာအသင်းသည် လာမည့်ဇန်နဝါရီအပြောင်းအရွှေ့ကာလတွင် မန်စီးတီးတောင်ပံကစားသမား စတာလင်ကို ခေါ်ယူရန် ပစ်မှတ်ထားနေပြီး မန်စီးတီးအသင်းက ၎င်းအတွက် ယူရိုသန်း ၆၀ အထိ အလိုရှိနေကြောင်း သိရသည်။ ထို့ ကြောင့် ဘာစီလိုနာအသင်းသည် စတာလင်ကို ဖရန် ကီဒီယွန်းနှင့် အလဲအထပ်ပြုလုပ်မည်ဟု သတင်းထွက်နေသည်။
