ရီးယဲလ်မက်ဒရစ်အသင်း၏ဝေးလ်စ်တောင်ပံကစားသမား ဂါရတ်ဘေးလ်က မိမိသည် အသင်းတွင် နံပါတ်တစ်ဂေါ့ဖ်သမားဖြစ်သည်ဟု အရွှန်းဖောက်ခဲ့သည်။
”ရီးယဲလ်မက်ဒရစ်ရဲ့အဝတ်အစားလဲခန်းထဲမှာ ဂေါ့ဖ်ကစားသူဆိုလို့ ကျွန်တော် အပါအဝင် နှစ်ဦးသာရှိပါတယ်။ ဒါကြောင့် အသင်းမှာ ကျွန်တော်ဟာ နံပါတ်တစ်ဂေါ့ဖ်သမားဆိုတာ သံသယရှိစရာမလိုပါဘူး။ ကော်တိုအာက ဂေါ့ဖ်ကစားတဲ့ အခြားတစ် ယောက်ပေါ့။ ဒါပေမဲ့ ကျွန်တော့်လောက် သူ မကောင်းပါဘူး”ဟု ဘေးလ်က ပြောကြားခဲ့သည်။
ပြီးခဲ့သည့် စပိန်အိုးပင်းဂေါ့ဖ်ပြိုင်ပွဲကို လာရောက်ကြည့်ရှုခဲ့သည့် ဘေးလ်သည် သတင်းထောက်များနှင့် တွေ့ဆုံစဉ် ယင်းကဲ့သို့ ပြောကြားခဲ့ခြင်းလည်းဖြစ်သည်။
အသက်(၃၂)နှစ်အရွယ်ရှိပြီဖြစ်သူ ဘေးလ်သည် ပြီးခဲ့သည့် ၂၀၁၉ ခုနှစ်တွင် ဝေးလ်စ်အသင်း ယူရိုခြေစစ်ပွဲအောင်မြင်မှု၌ Wales. Golf. Madrid ဟုရေးသားထားသော ဝေးလ်စ်အလံကို ကိုင်ဆောင်အောင်ပွဲခံမှုကြောင့် ရီးယဲလ်ပရိသတ်များ၏ ဝေဖန်ပြစ်တင်မှုကိုလည်း ခံခဲ့ရသည်။
ဘေးလ်သည် လက်ရှိတွင် တံကောက်ကြောဒဏ်ရာကြောင့် အနားယူနေရပြီး သူ၏ ဒဏ်ရာမှာ ပြန်လည်သက်သာလာနေပြီဖြစ်သော်လည်း အစောဆုံး နိုဝင်ဘာလတွင်မှ အသင်းအတွက် ပြန်လည်ကစားပေးနိုင်ဖွယ်ရှိသည်။
၎င်းအနေဖြင့် ယခုရာသီတွင် အသင်းအတွက် (၃)ပွဲသာ ကစားထားရပြီး လေ့ကျင့်ရေးတွင် ဒဏ်ရာရရှိမှုကြောင့် သြဂုတ်(၂၈)ရက်၌ကစားခဲ့သော ဘက်တစ်ကို (၁-၀)ဂိုးဖြင့်အနိုင်ရသည့်ပွဲစဉ်ပြီးကတည်းက အသင်း၏ပွဲစဉ်များနှင့် လွဲချော်နေခြင်းဖြစ်သည်။
