မန်ယူအသင်း၏ ပြင်သစ်လက်ရွေးစင်နောက်ခံလူ ဗာရန်းသည် UEFA Nations League ဗိုလ်လုပွဲတွင် ဒဏ်ရာရရှိသွားသဖြင့် ခံစစ်ပိုင်းအတွက် စိုးရိမ်စရာဖြစ်လာကြောင်း သိရသည်။
ဗာရန်းသည် စပိန်အသင်းအား အနိုင်ရသည့်ဗိုလ်လုပွဲတွင် ပွဲထွက်ကစားသမားအဖြစ် ပါဝင်ခဲ့သော်လည်း ဒဏ်ရာရရှိသွားသဖြင့် ပထမပိုင်း ၄၃ မိနစ်တွင် အူပါမယ်ကာနိုနှင့် လူစားလဲခဲ့ရသည်။
၎င်းအနေဖြင့် ယာဘက်ပေါင်ကြွက်သားဒဏ်ရာ ရရှိသွားခြင်း ဖြစ်ပြီး ဒဏ်ရာအခြေအနေကို မသိရသေးသော်လည်း ယခုတစ်ပတ် ပြန်လည်ကစားရမည့် ပရီးမီးယားလိဂ်ပွဲမတိုင်မီ ကြံ့ခိုင်မှုပြည့်ဝရန် မသေချာသေးကြောင်း သိရသည်။
မန်ယူအသင်းတွင် အဓိကနောက်ခံလူဖြစ်သည့် အသင်းခေါင်းဆောင် မက်ဂွိုင်းရားမှာ ဒဏ်ရာကြောင့် စက်တင်ဘာလကုန်ပိုင်းကတည်းက အနားယူနေရပြီး ပြန်ကစားနိုင်ဦးမည်မဟုတ်သောကြောင့် ဗာရန်း၏ဒဏ်ရာသတင်းမှာ ထိုးနှက်ချက်ဖြစ်စေခဲ့သည်။
မန်ယူအသင်းသည် နိုင်ငံတကာရက်သတ္တပတ်ကာလအပြီးတွင် ပွဲကျပ်များ ဆက်တိုက်ကစားရမည်ဖြစ် ပြီး အောက်တိုဘာ ၁၆ ရက်တွင် လက်စတာ နှင့် အဝေးကွင်း၊ အောက်တိုဘာ ၂၀ ရက်တွင် အတ္တလန္တာနှင့် အိမ်ကွင်း၊ အောက်တိုဘာ ၂၄ ရက်တွင် လီဗာပူးလ်နှင့် အိမ်ကွင်း၊ အောက်တိုဘာ ၃၀ ရက်တွင် စပါးနှင့် အဝေးကွင်း၊ နိုဝင်ဘာ ၂ ရက်တွင် အတ္တလန္တာနှင့် အဝေးကွင်း ကစားရမည်ဖြစ်သည်။
မန်ယူအသင်း ခံစစ်ပိုင်းမှာ ယခုရာသီ ပရီးမီးယားလိဂ်တွင် ခုနစ်ပွဲကစား ခြောက်ဂိုး ခွင့်ပြုထားရသည်။
