ဘာစီလိုနာအသင်း၏ တိုက်စစ်မှူးဟောင်း လူးဝစ်ဆွာရက်ဇ်က ကွင်းလယ်ကစားသမားဟောင်း ဇာဗီကို ဘာစီလိုနာနည်းပြဖြစ်လာရန် မျှော်လင့်ကြောင်း အင်တာဗျူးအစီအစဉ်တစ်ခုတွင် ပြောကြားခဲ့သည်ဟု AS က ဖော်ပြခဲ့သည်။
အဆိုပါအင်တာဗျူးအစီအစဉ်တွင် ဂျာနယ်လစ် ဂျရတ်ရိုမဲရိုးက အသင်းဟောင်း ဘာစီလိုနာအသင်းနှင့် ပတ်သက်သည့် အကြောင်းအရာများကို အဓိကမေးမြန်းခဲ့ခြင်းဖြစ်ပြီး ဆွာရက်ဇ်ကလည်း ပွင့်ပွင့်လင်းလင်း ဖြေကြားခဲ့ခြင်းဖြစ်သည်။
ဘာစီလိုနာ နည်းပြရာထူးကို ဇာဗီ ရယူခဲ့ပါက ဖြစ်နိုင်ခြေများကို မေးမြန်းခဲ့ရာ ဆွာရက်ဇ်က ”ဘဏ္ဍာရေးပြဿနာတွေ ရှိနေချိန်မှာ နည်းပြအဖြစ် ဆောင်ရွက်ရမယ်ဆိုရင်တော့ ဇာဗီအတွက် ခက်ခဲနိုင်ပါတယ်။ ဒါပေမဲ့ အသင်းရဲ့ အဝတ်လဲခန်း တိုးတက်မှုရှိလာမှာတော့ သေချာပါတယ်။ ဇာဗီက ဒီအသင်းအကြောင်း ကောင်းကောင်းသိနေတဲ့သူဖြစ်ပြီး မှန်ကန်တဲ့အချိန်မှာ ရွေးချယ်နိုင်ဖို့တော့ လိုအပ်ပါတယ်။ သူ ဘာစီလိုနာနည်းပြဖြစ်လာဖို့ ကျွန်တော် မျှော်လင့်ပါတယ်”ဟု ပြောကြားခဲ့သည်။
မက်ဆီနှင့် ပြန်တွဲကစားနိုင်ခြေရှိသလားဟု မေးမြန်းမှုကို ”ဒါကို ဘယ်သူမှ သိနိုင်မှာမဟုတ်ပါဘူး။ တစ်နှစ် ဒါမှမဟုတ် (၂)နှစ်၊ ဒါမှမဟုတ်(၃)နှစ်အတွင်းမှာ ဖြစ်လာနိုင်ပါတယ်။ ကျွန်တော် မက်ဆီနဲ့ အသင်းတစ်သင်းတည်းမှာ ပြန်တွဲကစားချင်ပါတယ်။ အဲဒါ ဖြစ်နိုင်ခြေလည်း ရှိပါတယ်”ဟု ပြောကြားခဲ့သည်။
ထို့ပြင် ဘာစီလိုနာအသင်းအနေဖြင့် လူငယ်ကစားသမား အန်ဆူဖာတီကို ဖိအားမပေးသင့်ဟုလည်း အကြံပြုခဲ့သည်။
