၂၀၂၀-၂၁ ရာသီ ဥရောပရွှေဖိနပ်ဆုကို ရရှိခဲ့ခြင်းအတွက် ဂုဏ်ယူကြောင်းနှင့် ယခုဆုကို မိမိဘက်မှရပ်တည်သူများအတွက် ရည်ညွှန်းကြောင်း လီဝန်ဒေါစကီး ဆို

ဘိုင်ယန်မြူးနစ်ဝါရင့်တိုက်စစ်မှူး လီဝန်ဒေါစကီးက ၂၀၂၀-၂၁ ရာသီ ဥရောပရွှေဖိနပ်ဆုကို ရရှိခဲ့ခြင်းအတွက် အလွန်ဂုဏ်ယူကြောင်းနှင့် ယခုဆုအား မိမိဘက်မှရပ်တည်ခဲ့သူများအတွက် ရည်ညွှန်းကြောင်း ပြောကြားခဲ့သည်။

အသက် (၃၃)နှစ်ကျော်ပြီဖြစ်သည့် ပိုလန်ဝါရင့်တိုက်စစ်မှူး လီဝန်ဒေါစကီးသည် ပြီးခဲ့သည့် ၂၀၂၀-၂၁ ရာသီက ဘွန်ဒစ်လီဂါပြိုင်ပွဲတွင် (၂၉) ပွဲကစားရာ (၄၁)ဂိုးအထိသွင်းယူခဲ့ပြီး ဒုတိယနေရာမှ အာဂျင်တီးနားတိုက်စစ်မှူး မက်ဆီ (လာလီ ဂါ ၃၅ ပွဲ၊ ဂိုး ၃၀)ကို ကျော်ကာ ဥရောပရွှေဖိနပ်ဆုကို ရရှိခဲ့ခြင်းဖြစ်သည်။

လီဝန်ဒေါစကီးသည် ပြီးခဲ့သည့်အင်္ဂါနေ့က ဥရောပရွှေဖိနပ်ဆုကို လက်ခံရရှိခဲ့ပြီး ၎င်း၏ကစားသမားဘဝတွင် ပထမဆုံးအကြိမ်အဖြစ် မှတ်တမ်းဝင်ခဲ့ကြောင်း သိရှိရသည်။

လီဝန်ဒေါစကီးက ”ဒီဆုကိုရရှိတဲ့အတွက် ကျွန်တော် အရမ်းဂုဏ်ယူပါတယ်။ ကျွန်တော့်ကို ထောက်ပံ့ပေးခဲ့ကြတဲ့ မိသားစု၊ အသင်းဖော်တွေနဲ့ ဘိုင်ယန်မြူးနစ်က လူတွေအားလုံးကို ကျေးဇူးတင်ပါတယ်။ ဒီဆုကို သူတို့အတွက်ရည်ညွှန်းလိုပြီး သူတို့ မရှိရင် ကျွန်တော့်အနေနဲ့ ဒီဆုကိုမရနိုင်ပါဘူး”ဟု ပြောကြားခဲ့သည်။

ဥရောပရွှေဖိနပ်ဆုကို ၁၉၆၇-၆၈ ရာသီတွင် L’Equipe က စတင်ချီးမြှင့်ခဲ့ပြီး ၁၉၉၆-၉၇ ရာသီ မှစကာ ဥရောပအားကစားမီဒီယာများက ချီးမြှင့်ခဲ့သည်။

ဥရောပရွှေဖိနပ်ဆုကို PSG တိုက်စစ်မှူး မက်ဆီက ဘာစီလိုနာကစားသမားဘဝတွင် (၆)ကြိမ်ဖြင့် အများဆုံးရရှိထားသည်။