လီဗာပူးလ်အသင်းမှ အီဂျစ်တိုက်စစ် ကစားသမား ဆာလာသည် စီရော်နယ်လ်ဒိုကဲ့သို့ ပရော်ဖက်ရှင်နယ်ဆန်သည့် ကစားသမားတစ်ဦးဖြစ်ပြီး ထာဝရအကောင်းဆုံးလည်းဖြစ်သည်ဟု လီဗာပူးလ်နောက်ခံလူဟောင်းနှင့် နာမည်ကျော်ရုပ်သံဝေဖန်သူ ကာရေဂါက သုံးသပ်ခဲ့သည်။ ထို့ပြင် ကာရေဂါက နောက်ထပ်စာချုပ်သစ် ချုပ်ဆိုမည့်သူမှာ ဆာလာ ဖြစ်သင့်ကြောင်းလည်း တိုက်တွန်းခဲ့သည်။
လီဗာပူးလ်အသင်းသည် ယခုနွေရာသီ ကာလအတွင်း အမာခံကစားသမားများဖြစ်သည့် ဗန်ဒိုက်၊ အယ်လစ်ဆန်၊ အာနိုးလ်၊ ဖာ ဘင်ညို၊ ရောဘတ်ဆန်စသည့် ကစားသမားများကို စာချုပ်သက်တမ်းတိုးထားပြီး ကျန်ကစားသမားများကိုလည်း စာချုပ်သစ်ချုပ်ဆို ဖွယ်ရှိနေသည်။
“လီဗာပူးလ်အသင်းဟာ တခြားအသင်းတွေလို နွေရာသီမှာ ငွေသုံးမများခဲ့ပါဘူး။ သူတို့ဟာ အသင်းကကစားသမား တွေကိုပဲ စာချုပ်သစ် ချုပ်ဆိုခဲ့တယ်။ တစ်ခု ကတော့ ဆာလာကို လက်မှတ်ရေးထိုးဖို့ပါပဲ။ အခုချိန်မှာ သူဟာ လစာငွေတိုးလိုချင်တာ သိသာထင်ရှားပါတယ်။ မှန်ပါတယ်။ သူ့အနေနဲ့ ကံကောင်းမှာပါ။ သူက ဒါနဲ့ ထိုက်တန်ပါတယ်။ လီဗာပူးလ်အသင်းကို ရောက်လာကတည်းက သူဟာ ပရီးမီးယားလိဂ် လစာငွေအများဆုံးစာရင်းထဲ ပါဝင်ဖို့ ထိုက်တန်တယ်ဆိုတာ ပြသနိုင်ခဲ့တယ်။ သူ့မှာ ဒဏ်ရာပြဿနာ မရှိသလို၊ တစ်နှစ်ပြီးတစ်နှစ် ထိပ်တန်းဂိုးသွင်းရှင် ဖြစ်လာခဲ့ပါတယ်” ဟု ကာရေဂါက Sky Sports သို့ ပြောကြားခဲ့သည်။
ဆာလာသည် စက်တင်ဘာ ၁၂ ရက်က ကစားခဲ့သည့် လိဒ်စ်နှင့်ပွဲတွင် တစ်ဂိုးသွင်းယူနိုင်ပြီးနောက် ပရီးမီးယားလိဂ်ဂိုး ၁၀၀ ပြည့် မှတ်တမ်းကို ပိုင်ဆိုင်ခဲ့သည်။ဆာလာသည် ပရီးမီးယားလိဂ် ဂိုး ၁၀၀ ပြည့်သည့် ၃၀ ဦး မြောက်ကစားသမား ဖြစ်လာပြီး ပဥ္စမမြောက် ပွဲအနည်းဆုံးဖြင့် ရာပြည့်မှတ်တမ်းဝင်ခဲ့ခြင်း ဖြစ်သည်။ ထို့ပြင် ဒရော့ဘာ(၁၀၄ ဂိုး)ပြီး နောက် ပရီးမီးယားလိဂ်ဂိုး ရာပြည့်သွင်းယူနိုင်သည့် ဒုတိယမြောက် အာဖရိကကစားသမားလည်း ဖြစ်ခဲ့သည်။ ဆာလာ၏ ပရီးမီးယား လိဂ်သွင်းဂိုး ၁၀၀ တွင် ချယ်လ်ဆီးအသင်း နှင့် နှစ်ဂိုး၊ လီဗာပူးလ်အသင်းနှင့် ၉၈ ဂိုး သွင်းယူခဲ့သည်။
